噚日由民陣搞嘅大遊行，盲反派無視「打砸燒」行為，堅稱遊行「和平」進行；其實，遊行除咗「打砸燒」行為，本來可能出現極端暴力事件，因為警方喺遊行前，喺港九各區破獲咗幾個「武器庫」，除咗匕首、利刀等武器，仲第一次發現咗真槍同超過100發子彈，如果警方唔係及早執法，殺警行為隨時出現！囍雨極度懷疑，香港嘅槍械管制一向極度嚴格，所謂嘅激進分子或者「屠龍小隊」，到底係點樣攞到槍枝？發現槍枝除咗可能令暴力升級，同其他犯罪行為又有冇關係？

最危險的恐襲級警號

根據警方發言人表示，今次行動相信係有一個激進組織策劃，該組織曾參與襲擊旺角警署等行動，有媒體就指出有關組織係專門襲警嘅所謂「屠龍小隊」，警方懷疑佢哋計劃喺噚日嘅遊行中使用真槍實彈，襲擊市民同警員，企圖製造混亂同事端，然後嫁禍俾警方，警方表示佢哋及時嘅行動解除咗噚日遊行嘅重大危機。話雖如此，但一班激進組織、極端暴徒原來有真槍，到底仲有冇其他組織同樣持有真槍？同樣有計劃用槍襲擊警方、市民呢？

囍雨必須要強調，當反政府或者極端暴力分子「有槍在手」，意味住佢哋已經唔係只會掟磚、掟汽油彈咁簡單，而係隨時可以開槍殺人，警方可以係佢哋嘅襲擊目標，其他市民例如持不同意見嘅市民，都有可能成為「被殺」目標！

另一個問題，就係大家喺香港生活咁耐，都知道香港對槍械管制極度嚴格，到底啲極端暴力分子，係由咩渠道取得真槍實彈呢？佢哋背後有咩勢力支持佢哋？大家對於發現「一支槍」，當然可以無動於衷，當「無乜事」發生過，但囍雨想大家明白，如果有暴徒真係喺遊行、示威者場合使用真槍，咁唔單止可能係警方被「射殺」，任何身處示威現場嘅市民，包括小孩，一樣有危險。

消耗警力其他罪案增

最近，本身已經較少搶劫案嘅香港又發生金舖被賊人持械行劫嘅案件，今次警方破獲有真槍嘅武器庫，只係意味激端暴力分子將暴力再升級，定係同樣意味香港其化罪案都會增加，有人想香港趁亂「打劫」？警方執法受挑戰，表面上受影響嘅係示威區嘅居民，但其實當警方將大部分精力應付暴動、示威，打擊其他罪案嘅力量，必然有所影響。一句講晒，唔停止暴徒暴力，其他罪案亦可能隨之而來！ 

原圖:RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app