前交通銀行香港首席經濟及策略師羅家聰「被離職」，接受訪問時稱自己因「香港人身份」被辭，近日接受電台訪問，又話中資銀行嘅言論範圍「愈來愈窄」云云；凡事抱着懷疑態度嘅囍雨，就喺度諗呢位唱淡股市、樓市而出晒名嘅「末日博士」，今次反而「唱好」後市，話香港社會事件唔會對經濟有大影響喎，少有咁「唱好」後，發生「辭職」事件，又唱衰自己嘅舊東家，其實似係勞資糾紛多啲喎！

經常唱淡 經常估錯？

我哋觀察一個人，除咗「聽其行」，都要「觀其行」，咁睇一個經濟分析師，梗係要睇佢預測、分析準唔準啦，好似羅家聰咁，囍雨搜尋啲新聞睇下佢嘅「往績」，有啲真係嚇咗囍雨一跳，好似樓市咁，佢喺2011年8月，就曾指「認為經濟轉差、息口回升及內地資金班師回朝」，預料樓價「樓價要跌到二○一四年，跌幅四成才見底」；到2014年8月，又話「樓價相對收入及租金都超高，相信樓價未來數個月破頂後便回落，平均跌市年期達4.5年」，依家睇番佢啲預測，真係 ……

至於股市，呢個「末日博士」一樣好多末日論，不過預測結果一樣令人咋舌，2008年金融海嘯果時，佢就話恒指最惡劣可以跌至8000點，到2009年，就話恒指最低14000點；到2010年10月，可能因為佢見自己估得唔準，就索性同傳媒講唔做明年預測，皆因「去年測得唔係太準」；但2018年5月，佢又有估恒指喎，話「明年或低見20000點，籲投資者現應增持現金」，最後當然又係唔準啦！所以，睇到呢度，大家覺得呢個分析師點？

現在經濟不影響專業人士？

但有一點好奇怪，就係近日嘅社會、經濟環境大家都明白，普遍認為基層、中產、專業人士都可能受影響嘅時候，羅家聰呢個「末日博士」又講到提供專業服務嘅人士未必受影響咁，仲話歐美經濟好番啲對提供專業服務嘅人「有利」云云。囍雨唔係咩「經濟分析師」，當然唔能仔細分析啦，但囍雨睇新聞，既見到有文職同專業人員工會做調查，得出估計公司收入減少、有可能裁員嘅結果；睇其他調查，亦有會計業人士估計經濟將出現衰退，公司要審慎應對；重災區建造業，亦有業界代表話35萬從業員生計將受影響（唔會剩係影響工人而唔影響相關專業人士呀？），同埋政府已預料今年經濟負增長1.3%，11月本港採購經理指數（PMI）仲跌到38.5，係自2003年沙士後嘅新低，而10月失業率又升到3.1%，創埋兩年嚟嘅新高，羅家聰呢種類似「專業人士未必受影響」嘅論調，係咪真係準呢？

囍雨素來有求真精神，特意為咗呢個問題請教咗一位會計界人士同一位法律界人士，前者表明百業蕭條，會計為本地及外企提供受服務必受影響，會計師喺業界飽和嘅情況下，有業界人士只好跑內地為國內在港嘅子公司等提供服務，但今日「排華」、「排中」，絕對影響到會計界人士；後者就話律師當中有律師做公司上市相關嘅法律服務，亦有律師專做樓宇買賣，如果經濟受影響，呢啲業界人士都會受影響。睇完啲調查，再問下業界人士，然後諗番羅家聰嘅「分析」，無論係樓市、股市抑或今次嘅「專業服務未必受影響」論，羅家聰呢個經濟分析師，啲見解真係不枉為「末日博士」…... 

原圖：RTHK

 下載我們的手機應用程式，收看第一手精彩內容：https://bit.ly/2kgU8qg

請Follow我們的YouTube頻道：https://www.speakout.hk/app