早排廣男入去天水圍搵朋友，搭車入嘉湖山莊一帶期間見到一幕幕「奇境」，就係由天耀邨至嘉湖一帶，好多交通燈都被打爛，人同車喺無交通燈嘅情況下「自己睇環境」過馬路，司機們自己睇下附近有冇車出、有冇人過馬路，然後再開車過燈；人呢？就唯有打醒十二分精神，確保無車先過馬路，都咪話唔危險！原來，噚日有一名以電輪椅代步嘅老翁，喺一個交通燈被打爛嘅過路處，俾貨車撞到最後搶救不治。見到呢啲悲劇發生，唔知有份縱容黑暴破壞社會、打爛包括交通燈等設施嘅盲反派，仲會唔會話暴徒只係打爛「死物」，「不完美，但接受」呢？
打爛交通燈藏禍根
由六月修例風波開始，暴徒已經開始喺各區作出破壞，天水圍作為其中一個「戰場」，當然亦唔能夠幸免，道路、輕鐵站以至交通燈等，都受到唔同程度嘅破壞，結果本來嘅所謂打爛「死物」，終於疑似搞出人命。據傳媒報道，噚日下晝大約一點，一名坐電動輪椅嘅老翁喺天水圍天瑞路過馬路時，俾懷疑睇唔到交通燈損毁嘅貨車司機撞傷，老翁頭部重創，最終不治。
之前暴徒喺上水用磚頭掟死老人家，可以話係謀殺；暴徒向中年男子淋易燃液體再點火燒到人危殆、重傷，可以話係意圖「謀殺」；依家暴徒打爛交通燈，如果真係因為交通燈而間接令老翁被撞死，則可以話係「間接謀殺」。如果要廣男用一句說話去概括暴徒近月嘅行為，絕對可以用「殺人放火」去形容佢哋，大家係咪仲要縱容、包庇暴徒呢？
誰是意外幫兇？
今次嘅慘劇，可能有人會覺得唔關交通燈事，或者只係「個別事件」，但廣男想同大家講，類似嘅意外，隨時都有可能再發生！第一，無論係天水圍以至其他地區，好多交通燈俾暴徒打爛完到依家都未修復好，各種意外隨時出現；第二，除咗交通燈之外，大家唔好忘記無論係馬路、行人路，其實都俾暴徒打爛晒，普通市民就算只係喺行人路上行走，都可能因為被打爛嘅路面而出意外；第三，亦係最嚴重嘅問題，其實新界西北由於輕鐵站被嚴重破壞，有啲線路到今日都只可以提供有限度服務，如果呢啲鐵路出意外，會造成幾多死傷，真係難以估計！
香港唔應該被攬炒，市民亦唔應該被謀殺或「間接謀殺」，大家仲要縱容、同情黑暴？請謹記，我哋每一個人，都有可能成為黑暴運動嘅下一個受害者。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論