之前囍雨寫過一、兩篇文章，內容係講一批所謂「義士」，因為參與過7.1衝擊、破壞立法會行動，為咗逃避罪責所以「流亡」台灣，有義士接受訪問嘅時候更坦言自己「唔可以工作、唔可以求學」，被台灣當局冷待，有準備回港「受審」；今日囍雨睇新聞，又見到有所謂「義士」接受訪問嘅故事，接受「訪問」嘅義士被問到有冇後悔走上前線嘅時候，仲話俾多十幾萬次「機會」佢照樣會上前線，一副「無怨無悔」嘅姿態，但囍雨真心想問，每當夜深人靜、獨自一人沉思時，真係無任何後悔嘅感覺？

餘生做逃犯？

今次傳媒訪問嘅「義士」化名叫John，佢自稱由6月9日開始，佢就係最前線嘅「衝衝子」，7.1當日有份衝入會議室，有除低口罩，有留東西喺裡面，俾人認得出，加上之前俾人（應指警察）「抄牌」，所以決定去台灣；去到台灣後，佢收到家人消息指有警察去過佢屋企話要搜屋，所以佢知道自己「不能回去了」。由於手持旅遊簽證，實際就係唔可以工作，John掙扎過好多次想返香港，但最終都係無行動，而對於後唔後悔上前線，佢就稱俾多十幾萬次機會佢，佢一樣會衝。睇到呢啲故事，囍雨嘅感覺就係，何必呢？

台灣拒提供庇護

對於好多人認為台灣成為香港示威者、暴徒嘅「逃犯天堂」，有事走去台灣就得，囍雨想講大家真係唔好咁天真，之前啲義士去到台灣，遭到當局冷待，想工作、讀書，難度極高，就算續簽證都只能夠續旅遊簽證。今日囍雨睇新聞，見到香港大專學界連同台灣政客開記者會呼籲台灣當局落實《難民法》（可能保護到「義士」嘅法案），台灣當局都無半個代表出席；香港嘅示威者、暴徒，係台灣當局包括總統蔡英文炒作政治嘅最佳工具，但利用完佢哋，又有冇幫返佢哋呢？有報道話，香港嘅示威者、暴徒淪為「政治condom（安全套）」，被人「用完即棄」，講法係有啲不雅，但囍雨覺得呢個說法，真係「sad but true」（令人哀傷但卻是事實）。

對於呢啲所謂「義士」嘅逃亡故事，大家必先要明白，如果佢哋唔係作出涉嫌犯法嘅行為，根本就唔會落得要「流亡」嘅結果。人去到台灣，係咪就無事呢？絕對唔係，手持旅遊簽證，即係想工作、讀書都好困難；如果返香港，又極大可能會被捕、被檢控，簡單嚟講，就係因為一時嘅衝動，令到自己有家歸不得，或者「一回家」就被捕」。囍雨認為，如果唔想餘生都偷偷摸摸，唔見得光，不如返嚟自首啦，唔統做「流亡者」做一世？咁佢哋啲家人又點算？逃避罪責，逃得一時，逃唔到一世。返嚟啦！

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app