荒謬！極度荒謬！理工大學被暴徒大肆破壞，理大校董會主席林大輝認為，示威者嘅對象係政府，稱理大喺事件中「十分無辜」，成為咗政府管治問題嘅「代罪羔羊」，若果全部費用由理大「找數」於理不合，政府有責任承擔有關費用云云。理大覺得自己「無辜」，廣男想問下，當初暴徒佔領理大，理大有冇譴責暴徒？有冇叫警察入去執法？暴徒走咗，理大有冇拒絕過警方入內？一開始唔想警察插手嘅係理大，縱容暴徒又係理大，對住暴徒唔出聲，依家想政府用公帑幫暴徒埋單，咁樣真係合理？
暴徒不是理大人 為何不譴責他們？
的而且確，喺過千名理大「留守者」當中，只有幾十個係理大學生，依家理大搞成咁，其餘以萬計嘅理大學生，都難免受到影響，但廣男第一個諗到嘅問題，係暴徒肆意破壞，點解唔係追究暴徒，而係「追究」政府呢？
回到理大被佔領嘅時間，當初過百上千計嘅「留守者」佔領咗理大，對外狂掟汽油彈同堵路，對內就將學校化作「兵工廠」和武器庫，連個泳池都俾暴徒當係「投擲汽油彈練習場」，理大管理層，你哋有冇譴責過暴徒？有冇叫過警察入內執法恢復番校園秩序？廣男就唔係好覺，反而一直睇新聞，理大方面就係咁叫警察唔好入去，咁依家暴徒打爛理大，係政府責任，定係理大都有責任，其實好清楚。
好喇，「留守者」好，暴徒也好，當呢啲人以「不同方式」離開理大之後，廣男記得開初理大係唔想警察入去搜證，可能之後見到太多汽油彈以至爆炸品，立場先有改變。大家要諗下，一個可以話係縱容、包庇暴徒嘅大學管理層，開頭唔想警察介入，搗亂破壞之後又唔想警察處理，如果真係要搵人埋單，理大管理層就算無份埋單，理大唔會完全無責任呀？以此道理，如果今次由政府為理大找數，下次再有大學被暴徒毀壞，是否又由政府負責，不斷填補呢個無底深潭？對納稅人又是否公平？
讓暴徒在校內胡作非為
前排有新聞報道，班教育界人士入理大「救走年輕人」，有暴徒當眾拉番啲中學生走，廣男就喺度諗，咁大班暴徒喺教育界人士甚至暴徒面前，佢哋唔譴責班暴徒，又唔叫警察「做嘢」，咁理大想點？佢究竟係受害人定係幫兇呢？有朋友講笑話，如果一間金舖被打劫，但東主唔俾警察入去捉人，事後又唔報警，咁呢個東主損失慘重，想向保險公司申索得唔得呢？保險公司真係睬你都傻！最近有兩單新聞，第一單係講有兩個年輕人破壞輕鐵站設施，結果俾法官判罰共28萬元嘅維修費俾港鐵（刑事責任另計），另一單就係一個中年男子喺警總外噴漆，結果被判監兼要賠償，唔知呢種判罰加賠償嘅方式，係咪可以應用發生喺理大嘅罪案呢？
請Follow我們的YouTube頻道：
下載我們的手機應用程式，收看第一手精彩內容：
評論