日前有旺角暴動案被告就算無掟磚、襲警一樣被判暴動罪成，被判監46個月；前兩日廣男睇新聞，又見到一名16歲少年因為「有意圖管有攻擊性武器罪」及「在公眾地方管有攻擊性武器」兩罪罪成，被判入更生中心，佢父親接受傳媒訪問，直言係暴亂黑手慫恿入世未深嘅學生走上不歸路，而佢個仔就做咗炮灰，並叮囑年輕人做事要諗後果，唔好淪為犧牲品。廣男睇到呢單新聞，感到無限唏噓，當啲政客依家享受緊選舉勝利、頭頂有光環嘅時候，為佢哋「鋪」出「美好前程」嘅年輕人，可能已經坐緊監，實在非常諷刺！
兒子被定罪 父親滿愁容
對於兒子罪成，其七旬父親受訪時眼圈發黑，滿面愁容，連日睡不安穩，呢名父親最初贊成兒子參與合法遊行表達訴求，點知所謂嘅合法遊行原來「笑裡藏刀，所謂「和理非」慢慢推向激進，最後變成勇武一群，而佢個仔就係咁嘅情況下做咗炮灰。其實，呢名父親都已經心水清，但兒子瞞住佢，以打波、到同學屋企等理由外出，之後就換上黑衫同全副衝擊裝備，呢名父親表示自己已經盡咗家長責任留意住兒子，規定佢平日放學按時回家，可惜，依然阻止唔到兒子 ….. 當佢去探監問兒子做咩唔聽勸告時，佢兒子只係話「有時啲嘢，行下前啲，行下前啲 …..」
「和理非」會變勇武
睇到呢個故事，大家會諗到啲咩？廣男就覺得有兩件事大家一定要留意，第一就係好多年輕人被煽動出嚟，初時都係叫佢哋參加「和理非」集會或者遊行，當佢哋出得嚟第一次、第二次，之後「和理非」有可能會因為環境、朋輩影響而成為「勇武派」或者《生果報》所講嘅「衝衝子」，最後會點？最後當然難逃被捕、被檢控甚至被定罪嘅結局，成為上述所講嘅「炮灰」！
第二個問題，亦係令人最難過嘅結果，就係即使係年輕人、學生也好，犯咗法，就要承擔後果，無論係之前旺角暴動案被定罪嘅年輕人，抑或係今次反修例風波被檢控、定罪嘅年輕人，佢哋嘅前途已經因為咁而大受影響，甚至有機會毁掉半生前程，呢啲年輕人，以後條路點走？學業、事業仲點發展？有啲政客話「案底令人生更精彩」，廣男真係想問一句，有幾精彩？咁精彩，啲政客唔自己落場做勇武派，「博」攞番個案底「精彩」一下？
最擔心守法精神鬆懈
年輕人犯法、被定罪嘅例子不斷出現，佢哋自己要承擔違法後果外，對社會其實一樣打擊極大；當違法抗爭不斷出現，都會影響到其他人本來秉持嘅守法精神，其他人守法意識弱咗同鬆懈咗，自然更容易會犯事，尤其係更大機會出現喺社會抗爭。繼續煽動、包庇，等到去探監先知過錯無法挽回，實在係追悔莫及，廣男必須要強調，喺守法問題上，黃、藍政見唔係重點，因為呢個係守護法治嘅黑白問題。
原圖：大公報
請Follow我們的YouTube頻道：
下載我們的手機應用程式，收看第一手精彩內容：
評論