盲反派喺區議會選舉報捷，即刻衝出嚟稱呢個係「五大訴求」嘅勝利，完全唔提四成多選票投下反暴力一票；到日前美國總統特朗普簽署《香港人權與民主法案》，囍雨以為成班盲反派政客，尤其係做緊立法會議員果班盲反派會衝出嚟扮「成功爭取」啦，但好奇怪地，佢哋當中只有公民黨楊岳橋出嚟講嘢，稱呢個係代表「港人過去半年付出一切都被國際社會看見」。係咪有盲反派政客怕得罪中間選民，所以收聲唔敢邀功？
法案或對港不利 政客避重就輕
對於《法案》通過，有啲人話呢個只係對個別人士產生影響，其實呢個講法唔係咁準確，因為如果美國來年真係檢討《香港政策法》，而又決定改變佢哋對待香港嘅關稅區地位，老實講好難話對香港完全無影響。唔知係咪因為呢個原因，除咗楊岳橋之外，睇新聞好似唔係好見到盲反派班立法會議員或者老一派嘅政客例如李柱銘等出聲，囍雨感覺，唔通係因為佢哋知道衝出嚟話「成功爭取」，分分鐘會得罪啲中間選民或者重視經濟嘅支持者，所以就保持低調，等班後生嘅政客代表「發聲」。
如果你問囍雨，囍雨只會用五個字形容《法案》，就係損人不利己。雖然暫時呢個《法案》唔會有咩實質嘢影響到香港，但《法案》簽署，唔多唔少都會影響到國際社會對香港嘅觀感，會唔會影響香港嘅投資環境以至經濟，都有待觀察；更甚者，《法案》就好似一個「證明」咁，可能會搞到外界以為香港班示威者以至暴徒有「認受性」，香港人除咗要「多謝」美國，亦要多得香港一班盲反政客周圍唱衰香港！
黃之鋒「復仇記」？
值得一提嘅係，「極力游說」美國通過法案嘅「香港眾志」黃之鋒，表示下一步問題就係有關法例嘅執行，聲稱會就制裁名單收集港人意見，並游說美國啟動制裁機制，目標包括香港官員、選舉主任同警察，同時仲會爭取英、歐等國家都有類似《法案》。《香港眾志》以至黃之鋒要巡迴唱衰香港，大家都知架喇，佢喺未被選舉主任DQ前，已經講到明《眾志》要籌錢爭取喺全球推動《法案》，依家佢咁刻意要將「選舉主任」納入制裁名單，佢係咪想報仇呢？本來一個推動「自決」甚至「港獨」嘅政客，就唔應該有資格參選香港嘅議會議席，唔知道加埋佢巡迴唱衰香港，係咪更加唔應該俾佢「走入體制」，參與香港嘅議會選舉呢？
請Follow我們的YouTube頻道：
下載我們的手機應用程式，收看第一手精彩內容：
評論