2016年農曆年初一晚旺角發生暴動，暴徒向警員掟磚，又在街頭縱火，雖然對比起今天黑暴行動，已經算係「小巫見大巫」，但係當時的確引起社會一片嘩然，而事隔3年多之後，再有人因參與旺角暴動而被判囚，一位人稱「佔旺女村長」嘅24歲女子畢慧芬，因協助「掘磚」同向火堆掟雜物，被裁定兩項暴動罪罪名成立，判監46個月。廣男想講，參與暴動後果嚴重，刑罰相當重，唔好因為一時衝動，或受人唆擺就以身試法，如果唔係隨時會後悔一生！

協助及鼓勵其他人襲警同樣有罪 

「佔旺女村長」嘅呢單暴動案，有一個特別之處，就係根據警員同新聞片段，都無見到女被告有掟磚嘅行為，但係就證明到佢曾經蹲係地下及拎起過磚頭，同埋企咗喺一眾示威者嘅最前方面，將雜物掟向火堆；而法官亦表明，就算被告無直接實質襲警，都係協助及鼓勵其他人襲警，眼見情況升級仲留喺現場，刑責同暴力示威者無分別，由於案情嚴重，喺考慮完求情因素後，酌情減刑到46個月。簡單嚟講，唔一定係要有實際暴力行動，只要係協助、鼓勵他人犯法一樣有罪！

犯罪後果嚴重 勿以身試法

廣男想提醒大家，犯罪後果相當嚴重，代價係可能會失去自由同埋一生嘅前途，以暴動罪為例，最高可以判囚長達十年，試問「人生有幾多個十年丫？」，所以大家一定唔可以犯法！而且香港係法治社會，要爭取訴求都要尊重其他人利益同法律限制，唔能夠用傷人、威脅他人性命、財產安全嘅犯法手段去爭取，法庭嘅判決亦清晰咁表達咗，絕對唔會姑息違法者；廣男都想問下，依家仲「抗爭」緊嘅暴徒，你哋係咪已經預咗坐監，失去自己一生人嘅前途？

對比黑暴行動嚟講，「佔旺女村長」嘅行為都算係相對「溫和」，但係都要判成46個月，咁依家班黑衣暴徒除左掟磚以外，仲有其他嚴重暴力行為，判刑相信會係更加之重，例如掟汽油彈係涉嫌縱火，最高刑罰係終身監禁，廣男想勸大家多一次，如果唔想坐監、毀掉前途，千祈唔好犯法，立即遠離黑暴！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app