早前聯合國人權事務高級專員講句公道說話，話港府「在很大程度上尊重行使（和平集會的）權利」，又抨擊香港示威者訴諸極端暴力，仲呼籲班示威者放棄同譴責使用暴力，奈何忠言逆耳，隨即惹嚟22個國際人權組織聯署批評，反指港府「系統性侵犯」港人和平集會及言論自由，譴責「過度使用武力」，仲建議設獨立調查委員會調查警方。囍雨覺得啲國際人權組織有啲問題，暴徒暴力，衍生警方執法，唔譴責暴徒暴力，外間只怪罪於執法嘅警方，係咪合理呢？ 

只批評「警暴」 淡化暴徒暴行

22個聯署組織聲稱，聯合國無譴責警方嘅「暴力行為」，等同否認咗有關香港「人權侵犯」事件嘅「可靠」同「詳細」紀錄，更加無視咗其他獨立專家嘅擔憂，所以佢哋呼籲港府推出具體措施緩和緊張局勢，減少「警方和少數示威者雙方嘅暴力」，第一步就係要成立獨立調查委員會，調查警方「過度使用武力」的行為，將涉事人員同佢上司「繩之以法」。簡單嚟講，呢啲外國組織就係企喺暴徒嗰邊，又係「沒有暴徒，只有警暴」嘅「道理」。

和平集會、言論自由從未受損

囍雨認為，暴徒先係港人和平集會嘅最大障礙，佢哋經常喺集會、遊行臨完結，甚至活動開始咗無幾耐就「發難」，到處堵路、大肆破壞，同樣嘅事喺過去幾個月不停重複發生，所以根本係暴徒破壞和平集會、示威在先，點解人權組織唔去譴責暴徒？而且一眾盲反派日日「暢所欲言」，輪流唱衰政府、抹黑警方，完全體現咗港人嘅言論自由！其他香港人享有嘅自由都無減少過，反而係黑色恐怖令市民每日都生活喺惶恐之中，又要擔心唔知會唔會因堵路而返唔到屋企，仲要驚隨時遭暴徒襲擊，所謂「系統性侵犯」港人自由嘅，到底係政府、警察，定係一班暴徒，其實好明顯！

仲有，當啲人權組織聲稱警方「過度使用武力」，說法一樣有問題，暴徒不斷喺街頭瘋狂掟汽油彈、襲擊警員、毆打「私了」市民、毀壞商店同埋銀行等，嚴重破壞社會安寧和秩序，咁警方面對暴徒嘅致命暴力威脅，係咪要用到相應武力？如果人權組織係反對暴力，係明辨是非，就應該先譴責暴徒暴行，而唔係批評執法嘅警方，雙重標準，且包庇暴徒！

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app