區議會選舉結果塵埃落定，盲反派取得超過八成議席，盲反派政客、媒體紛紛表示呢個係對政府不滿嘅「公投」結果，囍雨留意到今日《生果報》嘅社評，稱政府「如果再次逆民意而行，對五大訴求置若罔聞，扭曲抹黑區選的結果，證明和平遊行、和理非的選舉是沒用的，那麼，街頭抗爭的烽煙勢必重燃」；呢一種語調，係咪即係話如果政府「再唔答應」反政府人士要求，暴徒又要出嚟打砸搶燒呢？算唔算係恫嚇政府、市民？
民意並非一面倒
對於《生果報》社評講乜，相信唔駛囍雨多講，大家都會估到佢大抵意思係區選結果清楚「表明」五大訴求係主流，政府必須即刻回應，否則「街頭抗爭的烽煙勢必重燃」。囍雨想講，五成幾市民投票支持盲反派人士，無可否認係民意嘅表達，但另外四成幾市民支持建制派，呢啲唔係都係民意咩？
更加根本嘅道理，係咪議席多啲、選票多啲，就代表盲反派可以將「打砸搶燒」合理化甚至「合法化」呢？大家唔好忘記，喺過去幾個月，本港唔少主要交通幹道被阻塞，警察執法被襲，市民被行私刑圍毆「私了」、被放火燒傷甚至被磚頭掟死，商舖被打到稀巴爛，鐵路受到「恐襲」等等，絕對唔會因為選舉結果而令到呢啲暴力行為變成「可以接受」，犯法始終係犯法，暴力始終係暴力，無論選舉結果如何，都唔可以將「違法行為」變得「合法合理」。
投票不是合理化暴力
喺民主選舉，市民有權票投佢哋支持嘅候選人，但囍雨要指出一點，就係選舉結果邊一個陣營「贏」都好，咁樣唔代表大家可以捨棄法治；當反政府人士為選舉結果而「喝采」嘅時候，大家要明白，法治都係香港嘅核心價值之一，如果只有民主而沒有法治，社會一定會更亂，而《生果報》呢種唔回應訴求「街頭抗爭的烽煙勢必重燃」嘅語調，係咪《生果報》支持繼續「打砸搶燒」呢？如果係嘅話，唔該《生果報》講清楚，唔好一時扮和理非，一時又喺度美化、英雄化嘅暴力行為！
今次選舉結果，除咗反映部分市民對政府不滿外，囍雨覺得最令人擔憂嘅「客觀效果」，就係令人以為暴力方式表達意見係「可以接受」，甚至值得鼓勵；喺可以預見嘅將來，暴力示威、衝擊等行為仍然有機會出現（噚日喺理大附近都仲有人堵路、又去警員舉辦婚禮嘅酒店搗亂），因為暴力意識已經植根於部分反政府人士心中，需要時間去修正甚至教育。最令人擔心嘅地方係，當唔少學生都以為「暴力有市場」嘅時候，社會、學校仲唔出聲，大學生以至中學生，隨時又再變成「勇武派」、「衝衝子」，呢個絕對唔係香港要走嘅路。
原圖：文匯報
請Follow我們的YouTube頻道：
下載我們的手機應用程式，收看第一手精彩內容：
評論