唔知大家有冇發覺，其實過去幾日都幾好啊！成個社會終於有返久違嘅平靜，天朗氣清之餘，大家又可以用高投票率表達咗自己嘅政治訴求，其實正正證明咗，泛民也好、黑衣人也好，如果佢哋「克制」，畀一個寧靜、和平嘅生活環境大家，原來係做得到喎！廣男今次都真係要畀個「like」、讚佢哋一句「今次真係叻啦」！完美示範咗佢哋原來係唔洗使用暴力嘅。
睇番今次區選結果，講真果句，都唔知泛民係好彩定係佢哋策略運用得好，用160萬票就可以換嚟388個議席，喺呢方面廣男都真係要恭喜佢哋；相反嚟講，建制派就冇咁抵啦，120萬票只係換嚟59席。所以，睇嚟建制派真係要好好檢討下、向對手學習下喇。
叫黑暴唔好破壞社區、打砸燒
不過，廣男都要提醒各位泛民嘅新當選議員一句，千記唔好覺得贏咗選舉就萬事大吉喎，跟住落嚟就要好好履行職責，開始服務社區、服務市民啦。講真，地區工作真係唔容易做，所謂「民生無小事」，邊度爆屎渠你要第一時間去處理；邊度消防喉壞咗、被人塗鴉咗，市民又會第一時間搵你哋。一言蔽之，就係身為區議員，幾乎要24小時 on duty（當值待命），時刻記掛住民之所急、民之所需，所以廣男喺度真係要深深祝福呢啲議員，並寄望佢哋可以盡快造福社區。
廣男覺得廣大市民都要時刻提醒呢班泛民區議員，大家投票畀佢哋，唔係等佢哋贏咗之後日日重複嗌口號，大搞政治、分取政治利益㗎。佢哋新官上任，當務之急就應該快手啲處理下過去五個幾月嚟，全港咁多組被打爛嘅交通燈，無數被破壞嘅路面、掘起嘅磚塊，拆走嘅欄杆，以及好多被打砸燒嘅燒鋪，全港市民都好期待佢哋完美示範如何修復、重建我哋嘅社區。仲有，呢班區議員可能都要搵黑衣暴徒「商量」下，如果下次再堵路、破壞，唔好再四圍噴漆，打爛咁多交通燈、拆咁多欄杆、燒咁多鋪啦，因為最後都係要你班區議員執手尾㗎！
唔好派蛇齋餅糭 街坊鬧㗎
另一方面，廣男都要提提各位市民，區議員嘅職責就係要服務街坊，所以大家有咩意見、不滿，記得要行使公民權利去搵佢哋投訴、解決；如果見到有區議員平時唔做嘢、逢年過節就大派蛇齋餅糭，要記得「大聲話唔好」！仲有唔好搞平價旅行團，會畀其他政黨鬧㗎！總之，大家用手中一票選咗自己心目中嘅區議員，就要叫佢哋服務於民、還政於民，不過廣男相信呢班泛民區議員一定做得好嘅，斷估唔會有口話人、自己又做唔到呱！
請Follow我們的YouTube頻道：
下載我們的手機應用程式，收看第一手精彩內容：
評論