過去周日，全港近300萬選民用手中一票表達咗自己嘅政見與訴求，同時亦都創下唔少香港選舉史上「之最」。執筆之時，選舉結果基本塵埃落定，相信無論香港嘅政治光譜將會如何重塑，社會大眾都會尊重，呢個正正係香港民主精神嘅可貴之處；有選舉就會有輸贏，就會有人歡喜有人愁，嚟到呢一刻，政府要面對，政黨要面對，市民都要面對。囍雨認為，經過呢場選舉，香港又該如何走下去？係咪任由眼前暴力延續？呢樣先至係香港人真正要抉擇嘅關鍵問題！
囍雨深信，選民重視、投下代表自己嘅一票，無論出於何種政見，都必定有一個共同心願，就係希望香港「明天會更好」。不過，睇番今次選舉結果，當選者有勇武派、縱暴者、煽暴者甚至「獨派」人士；民主黨許智峯稱自己當選要「歸功前線手足」，學聯前副秘書長岑敖暉選舉前後都高叫「解散警隊」，又話今後要喺唔同戰線繼續「打落去」，或者大家應該深思，呢啲當選者嘅處事手法、以及佢哋所代表嘅是非觀、價值觀，又會將香港帶往何種境地呢？又會唔會令「明天更好」呢？
市民對政府不滿 建制成出氣袋
其實睇番今次選舉結果，近300萬張投票中，有約160萬投畀反對派，贏到388席；約120萬票投建制派，只攞到59席。如果單睇議席眾寡，無疑係建制派大敗，但由選票分佈嚟睇，泛民同建制仍維持六四之比，泛民得票57％，建制得票42％。唔可以忽視嘅係仲有逾四成嘅選民反對黑暴、維護法治。當然，影響選舉嘅客觀因素有好多，例如選民只睇重候選人嘅政治立場，而唔理佢哋嘅地區工作同政績。但囍雨認為，今次相差嘅「四十幾萬票」，重點反映出嘅係，市民大眾對依家政府真係好不滿，包括過去半年嚟，政府喺處理社會種種問題、爭議上嘅不作為，若非如此，囍雨相信民怨可能都未必上升到今時今日咁嘅地步。喺咁嘅情況下，無論係建制政黨定係議員，都無可避免成為咗市民發洩對政府不滿嘅「出氣袋」。囍雨覺得，如此艱難之下，呢「四十幾萬票」又的確唔係咩「大件事」；渴望止暴制亂、回復安寧嘅市民更加唔需要氣餒、悲觀。
選舉過後 還要選擇暴力破壞？
嚟到呢一刻，選舉已過，大家表完態、出過氣，「懲罰」完政府以及支持政府嘅政黨、議員之後，囍雨真心希望廣大市民自己要諗清楚，係咪要繼續用一啲極具破壞性嘅行為去表達訴求呢？係咪只要一有不滿就繼續燒鋪燒車燒銀行、癱瘓交通恐襲鐵路、甚至將不同意見者置諸死地呢？其實經過呢場選舉，囍雨認為大家應該睇到一點，就係原來香港人係完全可以用和平嘅方式去表達訴求，不妨睇下過去幾日，久違嘅平靜、安寧，順利嘅投票選舉，咪就係最好嘅證明囉！
請Follow我們的YouTube頻道：
下載我們的手機應用程式，收看第一手精彩內容：
評論