「佔中糾察長」郭紹傑之前喺日本東京靖國神社外燒「戰犯神主牌」道具被拘捕，還柙咗足足10個月，直至上個月中先獲釋返到香港；近日郭紹傑同《生果報》做咗個訪問，話自己唔恨日本人，仲分享咗坐監嗰陣嘅辛酸經歷，話自己十個月無煙食，身體仲出咗問題，雙腳有萎縮情況、記憶力稍退云云。廣男見到都覺得有啲慘，喺日本就咁燒「個牌」就無咗十個月嘅自由，對比之下，唔知郭紹傑覺唔覺香港真係「自由」好多呢？

日本坐牢 身心受損

喺報道入面，郭紹傑就話自己都無諗過要坐咁耐監，仲要唔俾佢保釋，佢仲形容喺拘置所（監獄）受到「軍事式」拘禁，因為佢係「重犯」所以要單獨囚禁，裏面不見天日，與世隔絕，而且去到星期六、日只可以坐喺監倉裏面，連企起身都唔俾；由於佢無得做運動、又長時間要跪坐，佢話隻腳出現萎縮、關節嚴重磨損、肌肉繃緊，仲批評日本監獄「好唔人道」，佢唔單止身體上受損，連精神都受到創傷咁話喎。廣男就覺得，似乎郭紹傑都幾不滿日本監倉嘅生活，不過佢係去坐監，又唔係渡假，難受始終都「在所難免」。

盲反派遺棄 咎由自取

單憑郭紹傑一面之詞，所謂日本監獄「唔人道」嘅指控，廣男就唔評論啦，但係成件事講到底，都係因為郭紹傑犯法在先。其實，係咪因為郭紹傑俾香港「寵慣」咗，就以為去到邊個地方都可以咁free？可以任你為所欲為，去示威、燒道具都「無後果」？咁郭紹傑未免太過天真啦，照搬香港嗰套去外國咪出哂事囉！咁就無咗十個月時間，無得陪伴家人，搞到個身體差咗，仲要日日擔驚受怕，唔知法庭會點樣判決，會坐多幾耐監，嗰種精神壓力都應該會幾大，就連盲反派中人都唔係太多人願意聲援佢，好似被遺棄咗一樣，但係廣男都係嗰句，一切都係佢咎由自取！

睇完郭紹傑嘅「故事」之後，廣男突然間忽發奇想，如果郭紹傑無喺2014違法佔中期間做佔領區嘅「糾察長」，冇俾「違法達義」歪風影響得咁深，唔知佢仲會唔會去日本「公民抗命」，搞到自己一身蟻，落得如此下場呢？不過好可惜，歷史係無如果，發生就係發生咗，大家都應該以郭紹傑作為警惕，無論係咩地方都唔應該以身試法，否則只會令自己抱憾終生！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app