有好多人講過，如果一啲政客喺選舉前做出「反常」行為，咁樣一定係為咗選舉、選票；好似《生果報》老闆黎智英咁，平日無論喺佢嘅報章專欄，抑或係佢旗下《生果報》嘅報道，基本上都係全力「縱暴」，甚至稱香港呢場抗爭係「新冷戰」一部分，佢哋係「為美國而戰」。但係黎智英近日竟然「一反常態」，叫人「堅守道德底線」，暗示叫人唔好咁暴力；黎智英係轉咗「死性」，定係為咗選舉？
唔係得暴力一條路？
日前，黎智英喺《生果報》有篇題為〈我們不只得暴力一條路〉嘅文章，內容稱「不譴責，不篤灰，不割席，不等於不分皂白，罔顧是非，不是我們對抗極權邪惡，便可以不顧道德底線」、中年男子被「淋油點火焚燒，看到消息我整個人呆住了，怎麼可能魯莽如斯！這完全踰越了抗爭的道德底線！」，講到自己好反對暴力咁，黎智英做乜突然有呢個「轉向」呢？
囍雨再順住篇文睇落去，當見到黎智英話「我們刻下最理想的抗爭模式是贏取今次區議會選舉的大多數議席，利用議會和街頭抗爭與政府雙線對抗。若區議會選舉失敗，只剩下街頭抗爭，我們行動便容易趨向極端」、「贏取11月24日區議會選舉，對於我們抗爭策略非常重要」。若然看着年輕人為我們站在前線擋子彈，我們卻不行出來投票，我們將會良知內疚」等內容後，囍雨終於明白咩事喇，原來黎智英講咁多嘢，突然好有良心咁，就係為咗選舉！
為選票講乜都得
對於黎智英呢篇文章，我哋睇唔到佢係同暴力割席，因為佢都只係話人「魯莽如斯」、「踰越了抗爭的道德底線」，充其量只可以話黎智英係為選舉「譴責」暴徒；綜觀黎智英篇文章嘅上文下理，囍雨覺得有兩點值得大家注意，第一就係暴徒嘅暴力程度，已經過分到連被奉為盲反派「金主」嘅黎智英，都覺得暴徒行為過分得不能接受；第二點就係，無論社會發生咩事，黎智英心中所想嘅，始終都係選舉、議席，諗點樣透過選舉「奪權」，啲大學生點受傷、被捕，始終都唔係黎智英嘅最重要考量。甚至可以講，如果暴力對選舉有利，幾可肯定黎智英、《生果報》會繼續叫人做「衝衝子」、「火魔法師」，最後佢哋絕對係可以犧牲嘅一群！
當黎智英呼籲「勇武暫時退場」、「和理非要投票」嘅時候，囍雨覺得社會上嘅沉默大多數都應該出嚟投票，用手上一票話俾所有人聽，市民唔接受暴徒暴行，亦唔接受包庇暴徒嘅政客、媒體；「和理非」的確要投票，不過係咪要投俾「縱暴派」，就大有商榷餘地！
原圖：中央社
請Follow我們的YouTube頻道：
下載我們的手機應用程式，收看第一手精彩內容：
評論