黑暴行動席捲全港，暴徒亦越來越兇狠殘暴，喺星期一馬鞍山，就有一個市民對暴徒暴行睇唔過眼，同佢哋嘈起上嚟，點知暴徒居然向佢淋潑易燃液體及點火，果個市民即刻變成「火人」，依家佢情況仍然危殆，身體有五成皮膚燒傷。外國傳媒BBC訪問立法會議員毛孟靜，期間提及呢宗血腥罪案，毛孟靜居然仲要幫暴徒辯護，話要體諒下香港人嘅心情。廣男真係唔明白，已經有片有證據，暴徒係意圖謀殺，將無辜市民置之死地，點解仲要繼續幫暴徒開脫？點解仲唔肯同暴徒割席？ 

毛孟靜接受BBC訪問果陣，俾主持問到，暴徒用火燒平民，點解仲要幫佢哋去揾藉口？毛孟靜竟然會話唔係藉口，仲講要理解香港人嘅心情，「警暴」已去到無法想（unthinkable）嘅程度，又批評特首林鄭月只係識話警方係好人，抗爭者（暴徒）係壞人之外，就乜嘢都冇做過，仲話港政只係按中央指令行事云云。一句講哂，喺毛孟靜眼中，原來「意圖謀殺」行為，都應該被「理解」嘅 … 真係令人「大開眼界」！

無理由讓暴徒取人性命！

廣男實在諗唔明，毛孟靜點解唔肯同暴徒割席，依家暴徒根本係毫無人性、泯滅良知，只係因為政見唔同或者口角，居然就可以冷血到向活生生嘅人縱火焚燒，喺噚日再有一個70歲嘅食環署清潔工，午休期間就俾暴徒掟磚，擊中頭部重傷命危，仲出現腦幹死亡跡象，情況危殆；廣男想講，暴徒嘅「心情」，香港人絕對唔會理解得到，無一個理由係可以俾暴徒「攞人命」，唔通有政治訴求就要用殺人嘅方式去達成？呢個明明就係良知同道德問題，同反政府示威根本無關，毛孟靜夾硬拉埋警方同政府嚟批評，只係轉移視線，對暴行避重就輕，試圖矇混過關，仲可以一石二鳥，順便唱衰埋港府、中央，但係人命同公義呢？唔好意思，要先行埋一邊啦！

其實唔單止毛孟靜，係連盲反派都要「縱暴」到底，唔願意表態讉責暴力。大家可能都唔明，點解盲反派連暴徒，甚至意圖謀殺嘅罪犯都要包庇呢？廣男話你知，就係因為盲反派政客都係政治大過天，好怕會得罪暴徒，流失選票，所以無論暴徒點錯都要「盲撐」落去，呢個就係佢哋嘅真面目。廣男希望大家喺嚟未來選舉，用手上一票，表達對暴力、縱暴分子嘅不滿，以票止亂！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app