有時候睇一班人有幾殘酷冷血，唔單止要睇佢哋或者佢哋嘅「同路人」做啲咩，仲要睇埋佢哋對冷血行為嘅反應，咁就大概知道呢班到底係咩人。好似噚日咁，一名中年男子喺馬鞍山試圖喝止暴徒進行破壞，當佢追趕、批評暴徒嘅時候，竟然有暴徒向佢潑易燃液體，繼而點火將男子活活燒成「火人」，受傷男子送院兼危殆；眼見呢啲極端暴力甚至係意圖謀殺行為發生，網上面竟然仲有人話受害男子係「做戲」、「做特技」甚至「自燃」等等荒謬留言。囍雨直頭覺得，呢啲無人性嘅說話簡直係令人髮指，完全超越咗作為人可以接受嘅底線！

極度暴戾 泯滅良知

對於一啲冷血言論指受害人係「做戲」、「特技人」等，囍雨真係想問下大家，有冇人會攞自己條命嚟「做戲」呢？仲有，醫管局已經澄清，沙田威爾斯親王醫院噚日下午接收咗一名嚴重燒傷病人，情況危殆，並呼籲外界停止轉發有關失實訊息；事實上，該名受害人被診斷有四成皮膚二級燒傷，分分鐘有生命危險，喺呢個時候仲話人哋係「做戲」、「收錢做嘢」，講得出呢番泯滅良知說話嘅人，仲有人性可言？

囍雨覺得，極度暴戾嘅行兇者故然可恨，但一班冷眼旁觀甚至借機抽水嘅人，根本就係助紂為虐，唔理佢係所謂嘅KOL、網民或者「假和理非」都好，喺度散播假訊息，唔面對行兇者極端殘暴嘅行為，儼如兇徒嘅幫兇一樣；甚至可以話，佢哋本身亦係恐怖分子嘅一分子。無論有咩政治理由，以企圖奪去他人生命嘅方式行事，就絕對不能接受！

任何政治訴求不能攞人命！

近月一班反政府人士不斷表示佢哋有唔同嘅政治訴求，囍雨希望大家明白一點，就係無論有咩政治訴求都好，根本就唔能夠合理化呢啲完全係想「殺人」嘅行為，而當一啲偏袒暴徒嘅人不斷話呢啲人只係學生、青年，對唔住，學生、青年唔係犯罪理由，亦唔係成為恐怖份子嘅藉口；老實講，依家暴徒、兇徒連人命都唔顧及，大家仲要支持呢啲無人性嘅行為，咁支持佢哋嘅人其實一樣係無人性。

睇返件事，被火燒傷嘅中年男子到底做咗咩事？佢「最錯」嘅，就係佢竟然喺黑暴之下伸張正義，阻止、批評一啲暴徒破壞鐵路站，最後落得被兇徒用火燒嘅下場。當部分人要認同、「力挺」謀殺行為，呢種現象比暴行更加恐怖！

原圖：rthk

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app