呢排成日見到一啲示威者甚至黑衣暴徒對住鏡頭，大大聲講「我哋真係好愛香港呢個地方」、「我哋抗爭係為咗保護呢個家園」云云。囍雨聽完，只能暗自無奈、一笑置之，然後內心不禁發問：你哋真係因為愛？或者呢個問題，依家都值得廣大市民深思一下——有冇人會用掟汽油彈、堵路破壞、打砸搶燒去「愛」自己生活嘅家園？又有冇人會對住同樣生活喺呢個家園嘅市民點火謀殺？囍雨想講，請睇清楚，今時今日示威者甚至暴徒會「上街」，絕對唔係因為「愛」，而係仇恨！
問題係，仇恨從何來？不如等囍雨先同大家「介紹」下壹傳媒老闆黎智英日前嘅一篇文章。呢篇《獨裁中共下跌微塵香港》，相信大家單睇標題就約摸估到黎智英嘅主旨係咩，冇錯！又係製造矛盾。黎智英喺文中提到「一地兩檢，讓大陸公安在港執法」、「隨意DQ參選人、秋後算帳」等「例子」；又講到「我們認識的香港已面目全非、自由危在旦夕」，然後又揚言「世上沒有無緣無故的恨」、「抗爭成為香港人以後的命運」等等。老實講，黎智英所提嘅例子及論調，冇一件經得起事實嘅考驗，但呢啲極具煽動性嘅字眼，對於果啲不求真知嘅人、尤其係年輕人嚟講，就足以引起內心嘅恐懼、繼而變成仇恨。於是，呢種仇恨亦都成為咗「抗爭」嘅理由、動力。
洗腦令青年激進化
囍雨想講，點解依家有咁多人「熱衷」走上街頭搞「抗爭」，黑暴運動可以持續咁長嘅時間，咪就係因為有黎智英、《生果報》，以及同類嘅黑媒體，喺過去一段時間不停用一啲未經證實嘅炒作去加深矛盾、燃點仇恨囉！大家不妨睇下，街頭果班「抗爭者」，逢「中」字嘅銀行、商舖必反，大鬧「支那、黨鐵、克警」，背後所顯示嘅，就係無論香港同中央之間、香港人同內地人之間，甚至依家連香港人同香港人之間、香港人同警察之間，矛盾同仇恨都去到一種「一觸即發」、一發不可收拾嘅地步；之前就打砸搶燒，今日仲發展到公然冷血點火殺人、以攞人命為目標。嚟到呢一刻，大家係咪應該諗下，呢啲係咪香港應該有嘅樣子，係咪我們想要嘅香港呢？
煽動仇恨的黑媒體
如果大家有留意，會發覺依家示威者以至暴徒嘅口號，已經由「加油」轉變成「反抗」，而呢種轉變，就好似為已經持續五個月嘅黑暴運動注入咗新嘅「動力」咁，一班年輕人亦都被煽動得更加激進、瘋狂。囍雨想講，冇錯啊！依家香港人的確要反抗啊！但反抗嘅對象正正就係果啲不斷煽動仇恨嘅黑媒體，以及籠罩香港嘅黑色暴力、黑色恐怖！香港人要嘅，唔係自己同自己「抗爭」，而係同別有用心、破壞香港嘅媒體、政客抗爭，恥與佢哋為伍！
請Follow我們的YouTube頻道：
下載我們的手機應用程式，收看第一手精彩內容：
評論