日前科大校長史維喺校內同學生舉行對話會，期間一名內地生手插褲袋、慢步離開會場，就喺呢個時候，發生咗令人乍舌嘅一幕。囍雨由網上片段見到，一個戴帽戴口罩嘅黑衣人士，喺該名內地生經過身邊時突然「自動彈開5呎」跌落地下，呢個誇張嘅「插水」動作，就引嚟一批人圍堵呢位內地生；此時有人就聲稱，係被呢位內地生「推跌」，繼而一班人當住校長面對佢行私刑，打到佢頭破血流，成個圍毆過程仲有人以雨傘掩護。即使校長介入喝止，一班施暴者仍唔收手，仲要求史維「譴責警暴」，質問佢「點解唔可以好似中大校長（段崇智）咁」、「以顯示對學生嘅關懷」……

大家認為，呢班學生嘅所作所為同「訴求」有冇道理呢？即係話，依家當住校長面涉嫌造假、「栽贓嫁禍」、繼而「私了」，冇人批評譴責之餘，仲要挾逼校長一定要「譴責警暴」，呢個係咩道理？囍雨實在要問，點解依家啲大學生會變得咁野蠻？要扮插水、然後去打人；香港嘅校園係咪示威大晒、學生惡晒？再諗深一層，呢啲惡劣行為嘅「禍根」又係咩？相信大家都睇得出，又係多得中大「段爸」校長當初對學生卑躬屈膝、「有求必應」嘅連鎖效應囉！但呢番扮好人、取悅學生嘅結果係咩？大家睇過噚日中大嘅畢業禮就知道，結果就係學生變本加厲照樣搞事，連莊重嘅畢業儀式都唔尊重，最後更搞到要腰斬收場。

儼如政治示威的畢業禮

大家如果有睇新聞，都知道呢兩日科大、中大都有畢業禮，但囍雨想講，所謂「畢業禮」基本上就係一場政治示威。就好似喺中大，畢業禮之前就有學生手持標語喺校園遊行、有人到處噴漆塗鴉；儀式期間又有人背對主席台「表達訴求」搞抗議。大家應該問，當呢班學生將「政治大過天」拎入校園時，有冇諗過仲有其他莘莘學子好珍惜自己嘅校園生活，希望喺一個寧靜嘅環境裡面潛心研學；當佢哋無限放大自己嘅「訴求」去騎劫成個畢業禮時，有冇諗過呢個莊重嘅儀式唔單只屬於佢哋，亦都可能造成其他畢業生終生都難以彌補嘅遺憾。

諷刺嘅係，新聞所見，段崇智校長終於喺佢嘅致辭裡面講到希望學生「學懂尊重」，囍雨只可以慨嘆一句，依家先嚟講，會唔會太遲？

「尊重」這一課 他們「未畢業」

嚟到今日，又一批大學生離開校園即將步入社會，對於佢哋嚟講，真正嘅人生歷練依家先至開始，囍雨喺度諗，或者呢啲畢業生論文寫得好、考試成績好，但「尊重」呢一門「人生必修課」，佢哋又係咪合格呢？將來又如何正確待人處事、服務社會？另一個層面，囍雨真係唔知，呢種政治騎劫校園嘅歪風會否繼續喺其他大學蔓延，但如此下去，香港咁多名牌大學嘅「金招牌」未來仲係咪保得住？因為大家自然會諗，究竟香港嘅大學，係搞政治定係搞學術？香港嘅教育仲係咪信得過？所以囍雨希望社會大眾、學校管理層都要深思同反省，今時今日我哋嘅年輕人變成咁，究竟教育出咗咩問題？係咪仲要姑息、縱容？除咗教曉學生書本上嘅知識，更重要係，當佢哋犯錯時，點解冇人挺起腰板直斥其非？敢於這樣做，才算係愛惜學生！

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app