中大校長段崇智早前向學生跪低，為佢哋「出頭」發公開信譴責「警暴」，結果一石激起千重浪，其他大學學生有樣學樣，紛紛強逼校長為他們「主持公道」，噚日（6日）科技大學舉行公開論壇，大批學生威逼校長史維譴責警方，史維不肯就範，學生就用粗言穢語指罵佢，最後對話仲變埋流血衝突，有內地生被圍毆「私了」，打到面部流血受傷。廣男感嘆，如果唔係段崇智開咗壞先例，力挺涉違法學生，都未必會發生呢種事，可以預見類似嘅「逼宮」行動肯定陸續有嚟！

威逼校長 襲擊內地生

其實科大生喺周一（4日）就已經包圍過校長史維超過6個鐘，要求讉責「警暴」，而噚日科大生再喺校內論壇，再次威逼史維「出頭」譴責警方，但史維堅持要確實證據先會讉責，學生即時發難、叫囂，仲鬧史維無盡到校長責任等等；之後一個內地生離場果陣，疑因撞倒一個黑衣蒙面本地生，被多人包圍、揮拳毆打，仲有學生幫手開傘阻擋鏡頭，最後衝突中有4個學生受傷。簡單嚟講，就係呢班科大生，已經唔再講道理，只要立場、意見不同，就要大肆抨擊，甚至出手打人！

「逼宮」事件將陸續有來

從客觀角度嚟講，段崇智為大學縱容學生、包庇暴力的確開咗一個極壞嘅先例，自從佢跪低咗之後，港大、公開大學等都先後「出事」，學生陸續要求校長表態、歸邊、讉責「警暴」等，總之就係要迫大學企喺學生嗰邊，如果校長拒絕要求，就包圍、破壞校園；「逼宮」事件不斷發生，暴力程度亦有增無減，令人側目！

廣男覺得最恐怖嘅係，科大生嘅暴力竟然喺校園都「升級」，只係因為輕微碰撞，或者睇對方唔順眼，就當住校長、老師、傳媒面前「私了」圍毆同學，佢哋同黑色暴徒有咩分別？更令人憤慨嘅係喺施襲者身邊舉傘嗰班人，竟然帶定雨傘出席校長論壇，究竟有何意圖？佢哋唔單止無制止暴行，仲要幫手隱藏、包庇，做暴徒幫兇。如今學生變得如此暴力、兇殘，就係因為有大學校長、盲反派政客不斷包庇，廣男喺度諗，大學之後，逼宮風氣會唔會蔓延到中學校園呢？如果會，咁教育界真係會全面「淪陷」……

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app