立法會議員兼屯門區議員何君堯「擺街站」時突然被兇徒用刀襲擊，利刀插中佢左上胸，需要即時送院治理，除咗盲反派政客，社會各界都大力譴責暴行，更指黑色暴力籠罩區議會選舉，影響選舉公平。今日囍雨睇《生果報》嘅相關報道，一時話何君堯「打尖做手術」，一時話佢「電光火石制服藍衣人」，一時又話《大公報》「『預知』何君堯受傷」，全方位「質疑」何君堯；囍雨就認為，《生果報》唔譴責兇徒暴行、同暴力割席，反而處處針對甚至攻訐作為受害者嘅何君堯，呢啲算唔算係二次傷害受害人呢？
標題內文「各自表述」
今日囍雨睇《生果報》三單新聞報道，標題分別為「傷口1.5厘米 爬17人頭何君堯打尖做手術」、「屯門拉票遇襲 電光火石制服藍衣人」同「《大公報》『預知』何君堯受傷」；簡單嚟講，表明或隱含意思就係話何君堯入醫院做手術「打尖」，質疑佢同身邊人點解咁快「制服」兇徒，同引導人諗《大公報》一早知咩事，全方位「質疑」何君堯遇襲事件。
囍雨喺度首先要建議大家，睇《生果報》報道唔緊要，但一定唔好剩係睇標題同導言，因為佢哋嘅標題同導言，成日都誤導讀者！例如「傷口1.5厘米 爬17人頭何君堯打尖做手術」呢篇報道，一時話《生果報》接投訴稱何君堯打尖，一時又稱有外科醫生稱「何君堯被刺傷心臟及肺部附近位置，刀有機會接觸到肋骨，需檢查是否有氣胸及有否外物進入體內，安排在手術室內進行全身麻醉檢查及治療屬合理」，撇除《生果報》嘅消息真唔真嘅問題，《生果報》到底係想話何君堯打尖定係想話佢被安排入手術室合理呢？標題、導言，好似無講內文講嘅極重要重點喎，呢種「各自表述」方式係咪要誤導讀者？
擺明誤導讀者「得啖笑」
至於《生果報》稱「《大公報》『預知』何君堯受傷」篇報道，其實《生果報》內文都寫「大公網昨晚發聲明，澄清有關影片在周三11時54分發佈，但其後fb管理員賬戶疑被入侵，遭修改發佈時間功能，將該貼文發佈時間篡改至11月5日晚上7時54分，大公網對此予以強烈譴責」，既然《大公報》都話社交賬戶被入侵，點解《生果報》唔喺標題同導言講清楚，又想誤導人？
最後，關於《生果報》「屯門拉票遇襲 電光火石制服藍衣人」嘅報道，《生果報》引述一名實況防衞教練，稱何君堯「當時反應偏快」、「正常嘅話應該會有少少愕然，窒一窒，唔係咁make sense，有少少似有備而嚟」、「整套（施襲）動作係點到即止」等等，其實《生果報》係咪想講呢襲擊案係「有備而嚟」甚至係「做戲」呢？即係一個人遇襲，反應快啲都要俾人質疑？《生果報》嘅報道手法實在屈機！
《生果報》「做新聞」定「造新聞」？
有區議會候選人遇襲，《生果報》唔譴責兇徒都算啦，仲出咁多似是而非甚至係質疑番受害人嘅報道，大家真係要問《生果報》一句，佢哋到底係「做新聞」，定係「造新聞」囉！
何君堯為區議會選舉屯門樂翠選區候選人，同區候選人包括盧俊宇及蔣靖雯。
原圖：rthk、文匯報
請Follow我們的YouTube頻道：
下載我們的手機應用程式，收看第一手精彩內容：
評論