區議會選舉將會喺月底舉行，針對候選人嘅暴力事件接連發生，喺今朝又發生多一單，立法會議員何君堯喺屯門湖翠路「擺街站」果陣，一名男子走過去假扮向何君堯送花、要求合照，然後就喺袋入面抽出黑色利刀，刺向佢心口，在場人士立即將兇手制服，但何君堯被刺傷，恤衫上更留有大片血跡，救護員到場將佢送往醫院救治。廣男真係覺得好無奈，依家黑暴猖狂，暴徒不斷用暴力威嚇候選人，根本就係要將佢哋滅聲，嚴重破壞選舉公平，政府有必要馬上採取措施撥亂反正！

區議會選舉黑色的一天

何君堯喺遇襲後發聲明交代，提到佢俾兇徒持刀襲擊，左上胸被刺中，好彩目前無生命危險，正喺醫院接受手術治療；佢又直斥暴徒，控訴建制派已經俾「黑色勢力」威嚇籠罩，有辦事處、宣傳品俾暴徒刑毀，亦有候選人被抹黑，佢形容今朝襲擊事件係「香港區議會直選上黑色的一天」，競選秩序已經蕩然無存，直指香港已經亂夠，一定要止暴制亂，俾香港社會回復安寧。廣男想問暴徒一句，係咪為咗政治鬥爭，就可以無底線，甚至連「殺人」都可以呢？

盲反派拒與暴力割席

廣男想講，其實暴徒針對建制派已經唔係第一日嘅事，之前大量建制派議員辦事處被毀壞、塗鴉、縱火，但係今次暴徒暴力再升級，用利刀刺向何君堯心口，感覺好似意圖謀殺咁，暴徒用送花做掩飾，仲帶埋利刀喺袋，擺明就係早有預謀，而且仲要喺光天化日之下都敢郁手；其實同類嘅暴力事件無日無之，暴徒嘅目的就係要散播恐怖氣氛，令街坊不敢對區議會選舉事情表態同參與，而襲擊身為候選人嘅何君堯，就係想將佢嚇怕，以至令佢受傷，等佢無法繼續參選。如果候選人因為怕遭到襲擊，唔能夠再擺街站，咁仲可以點同選民接觸？搞到咁樣仲點確保選舉可以公平進行？

早前民陣召集人岑子杰在旺角遇襲受傷，盲反派24個立法會議員旋即發表聯合聲明，強烈譴責行兇者「足以致命的暴行」，散播造白色恐怖云云，措詞異常強硬，廣男就想問下盲反派，咁今次肯唔肯為何君堯發聲，譴責暴徒暴行，徹底同暴力割席？定係會繼續雙重標準，對暴徒隻眼開、隻眼閉，堅持包庇到底呢？今日盲反派召集人陳淑莊見記者，仍然未有譴責暴徒暴力！今時今日，極端暴力分子多次襲擊警員、市民、候選人，甚至想將佢哋置之死地，盲反派仲畏「縱暴」，令暴徒任意罔為、肆無忌憚？香港今日嘅亂局，盲反派政客根本都要負上極大責任。

何君堯出選嘅區議會屯門樂翠區，同區參選人仲有盧俊宇及蔣靖雯；岑子杰出選嘅區議會沙田瀝源區，同區參選人仲有黃宇翰。

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app