黑暴運動曠日持久，盲反派政客、反政府示威者同暴徒連成一線，形成「互相支援」嘅反政府集團；如果大家認為佢哋嘅規模得咁「大」，就太睇小佢哋，因為佢哋除咗得到外國勢力支持，其實喺政府入面亦有「反政府」力量為佢哋「助攻」，今日廣男睇新聞，就見到有學運背景嘅公務員（在勞工處工作）顏武周就聲稱要成立工會，「保護公務員自由表達意見的權利」。睇到呢度，真係嚇左廣男一跳，如果公務員要保持中立，唔能夠「自由表達意見」，又何來「權利」俾顏武周去保護呢？

學運人士 加入政府？

對於一個公務員話要成立公會「促進新制公務員權益」、「保護公務員自由表達意見的權利」，可能大家聽到都覺得奇怪，但廣男想講，大家只要知道顏武周嘅背景，就唔會覺得奇怪，呢個曾經係中大學生會成員嘅公務員，據報曾夥同當時為中學生嘅黃之鋒，一齊喺學界搞「反國教」運動，有報道指佢雖然近年變得「低調」，但實則仍然同盲反派沆瀣一氣，之前一個公務員集會，都係由佢發起。一個學運、反政府人士，入政府做嘢，但又搞公務員集會，又話要成立工會，睇落去真係有「入政府，反政府」嘅感覺。

至於顏武周話要成立工會「保護公務員自由表達意見的權利」，廣男隨手上網搵下資料，搵到公務員事務局前局長王永平喺2004年答立法會議員提問嘅一段說話，講明公務員政治中立原則包括「在政府作出決定後，不論個人立場如何，公務員應全力支持，把決定付諸實行，並且不應公開發表個人意見」、「公務員應協助主要官員解釋政策，爭取立法會和市民大眾的支持」。換句話說，如果政府作出決定，公務員唔單止應該全力支持，仲唔應該公開發表個人意見，咁大家真係要問下顏武周，所謂「保護公務員自由表達意見的權利」，到底係咩玩法？

不用效忠政府的公務員？

老實講，廣男覺得社會唔少人士或多或少都誤解咗政治中立原則，以為佢地平時做嘢「中立」，其他時候就可以「自由發表意見」；但其他地方好似美國咁，無論係共和黨抑或民主黨上台，公務員都要執行政府嘅指令，效忠自己嘅政府。香港雖然唔係行政黨政治，無所謂執政黨，但無論係咩議題，身為政府一分子，都要放開個人政見，喺政府作出決定後，支持政府、忠於政府，唔會發表所謂「個人意見」令政府尷尬。以依家政府講明要止暴制亂為例，公務員如果唔支持仲要唱反調，就好明顯違反政治中立原則，亦明顯唔係對政府忠誠；而喺反政府行動明顯有外國勢力介入嘅情況下，公務員仲要支持反政府行動，就更加唔能夠接受！

幾年前爆發違法佔領事件，當時喺大專、社運界就流傳一種說法，就係一班年輕人稱要走入、滲透體制，今日顏武周變成公務員，真係唔知係嚮應號召，定係有其他目的呢？綜觀近期嘅社會衝突，確實有公務員參與反政府行動，甚至有諸如消防員、助理文書主任等公務員因涉嫌違法被捕，咁依家政府點處理呢？將來又要點做好審查工作，以免政府變成反政府人士「集中營」，實在值得深思。

最後，廣男必須要強調，任由「反政府人士」進入體制，成為公務員，繼而又攻擊番政府，最終只會蠶食成個公務員體制，到時香港會點？後果真係不堪設想！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app