黑暴運動持續數月，雖然暴動規模、次數已經減少，但部分暴徒似乎仍然未想「鳴金收兵」，一到週末就出動，四處打砸搶燒；有人就分析，啲暴徒之所以看似「了無懼色」，係因為佢哋有盲反派政客撐腰，而盲反派政客背後，又有外國政要尤其係美國「支持」。囍雨今日睇到單新聞，係講美國紐約布魯克林區有示威抗議「警暴」，示威中有人堵路、有人破口大罵警員；睇到呢啲情景就令人諗起香港嘅示威者，當美國政要力挺香港嘅暴徒時，引用返啲美國政要嘅講法，美國係咪要警察立即停止「暴力」，兼回應市民訴求呢？呢啲又係唔係最美的風景線？

抗議警暴 市民「堵路」？

據傳媒報道，由於當局建議增加警員人手打擊搭霸王地鐵，以及網傳紐約警察毆打黑人青年嘅片段，所以引發千人上街示威，期間有示威者堵路，亦有示威者用粗口辱罵警員，示威持續咗一段時間後，有人因為喺警車塗鴉被捕，亦有人因為向警員吐口水被捕。呢啲情景，同香港嘅黑暴運動初期極度相似，唔知衝突發展落去，會唔會變成係紐約版「黑暴運動」呢？

之前西班牙加泰隆尼亞等地方發生類似香港黑暴運動嘅示威、暴動，已經有唔少人話香港嘅「革命模式」已經成功輸出全世界；今次紐約發生類似嘅示威，如果要囍雨用一句說話去形容事件，囍雨只能夠用「他朝君體也相同」去形容，美國嘅政要、政客，明明見到香港嘅黑暴運動不斷升級，竟然仲話要同香港「同行」，甚至要推動「香港人權民主法案」，制裁香港官員、警察云云；好喇，依家美國都有類似嘅示威，囍雨真係好奇，美國啲政要、政客會唔會叫美國嘅警察立即停止「暴力」、表示同示威者「同行」，以及宣布要制裁美國本土嘅警察呢？如果唔會，咁美國嘅政要、政客係咪雙重標準先？講真，「食花生」看待其他地方嘅暴亂，永遠都係輕鬆，但如果暴亂發生喺自己地方，相信美國啲政要、政客都笑唔出喇！

暴亂會向全球擴散

囍雨想講，香港發生黑暴運動，其他國家、地區嘅人見到，一樣可以有樣學樣，如果其他國家、地方唔想自己地方都出現類似暴動，最好嘅方法唔係「鼓勵」香港班暴徒，而係無分國界、政見，一同譴責暴力，同暴徒割席。今日美國紐約發生嘅示威，仲未算係好大規模，但如果示威浪潮繼續發展落去，會變成點真係好難講；如果美國討厭本土出現暴亂，相同道理，佢哋都唔應該「支持」香港暴徒。 

原圖：新華社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app