今個月24日就係區議會選舉投票日，今屆最多人關心嘅選舉問題，就係能唔能夠確保到選舉公平。日前，廉政專員白韞六就表示，廉政公署至今已經收到77宗就本屆區議會選舉嘅投訴，當中76宗屬於可追查個案，主要包括28宗涉嫌使用武力逼迫威脅候選人、18宗發布候選人虛假陳述同17宗賄選，白韞六重申會一如既往維持選舉公平同廉潔。廣男就喺度諗，當某啲人成日強調要「自由、民主」嘅時候，如果果班人又一直破壞公平選舉，咁算唔算係反民主呢？

影響選舉公平的「賤招」

無獨有偶，噚日一個關心選舉公平嘅關注，就召開記者會並臚列咗不法之徒影響選舉公平嘅「12招」，包括襲擊候選人、恐嚇、起底、破壞人哋辦事處、圍堵、破壞宣傳品、恐嚇商戶唔好貼候選人宣傳海報甚至恐嚇街坊等「招數」。如果呢啲指控屬實，咁涉事人好可能已經觸犯咗《刑事罪行條例》以至《選舉（舞弊及非法行為）條例》等法例。

廣男作為一個鍾意交朋友嘅人，身邊都有啲朋友正係參選緊區議會；有個年輕嘅參選朋友，早排自己嘅辦事處受到暴徒嚴重破壞，果位朋友同義工眼見連辦事地方都被破壞到體無完膚，本身已經相當無奈，但礙於黑暴勢力強大，佢都廢事節外生枝，無強烈譴責暴徒；但一連串破壞，除咗令佢自己擔心出街站受到威脅、威嚇，佢自己啲義工都擔心安全問題，結果就係喺「驚驚地」嘅情況下減少街上宣傳啦。咁去少啲街站都無計喇，之後又發覺掛喺街啲橫額都俾人攞走掉咗去其他地方；廣男就好奇，喺咁嘅情形底下，仲有公平選舉可言咩？

絕不能讓黑勢力入侵社區

呢啲廣男身邊嘅個案，相信喺唔少選區都發生緊，甚至有個案比廣男朋友嚟得更嚴重；面對呢啲情況，候選人行出街有危險，辦事處有危險，甚至連掛喺街上嘅宣傳品都有「危險」，廣男真係唔知喺呢啲情況之下，仲有咩選舉公平可言。客觀效果睇嚟，啲不法之徒對區選候選人作出種種威嚇，就係要啲候選人、佢哋身邊嘅義工驚，甚至連支持佢哋啲居民都想嚇退；如果啲候選人退縮、支持佢哋嘅居民又怕會受到針對，咁就正中不法之徒下懷，呢場選舉就更不公平、不公義。所以廣男覺得，面對黑暴威脅選舉，社會各方人士都唔好驚，一定要挺身而出！

距離投票日仲有三個星期多啲，廣男真心希望唔同嘅執法部門可以努力維護公平選舉。至於市民大眾，尤其係選民，千祈唔好怕黑勢力，大家如果因為咁而驚咗唔出聲，或者驚咗而唔投票，咁就會令社會更不公平、不公義；可以想像得到，當激進勢力繼續盤踞喺社區，咁大家嘅家園以後就更加唔安寧。 

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app