黑暴運動無日無之，除咗警察受襲、市民被毆，一眾中資機構以至被指為「親中」嘅商舖，都成為暴徒大律破壞甚至縱火嘅目標，當中中國銀行更加成為「重災區」，近月唔同分行都被大肆破壞，打爛玻璃、櫃員機等，甚至有暴徒喺銀行分行內放火，受損情況非常嚴重；有見及此，中銀唔少分行都用木板甚至鋼板圍封分行「保護」自己，結果竟然有人投訴圍板「阻街」，然後地政總署仲指銀行「非法佔路」，囍雨想問下，呢個受害商戶保護自己都唔俾嘅措施，係咩道理？算唔算係欺人太甚？

離地的地政總署

據報，早前已經有消防處聲稱收到市民投訴，近日就有地政總署介入事件，話收到投訴指涉事嘅中銀元朗分行以圍板佔用道路，要求該分行一個月內拆板，之後地政總署都可能知道自己要求「有問題」所以決定暫緩執法，要求該分行盡量將圍板移後，減少阻路。

唔少人睇到呢單新聞，都覺得無名火起，中銀作為經常被暴徒針對、破壞嘅目標，採取措施自保可以話係合情合理，大家要明白，中銀保護分行，除咗係保護自己嘅財物之外，亦都係保護緊市民嘅生命安全；如果無圍板圍封分行，喺服務時間突然又有人「恐襲」中銀分行，到時有人命傷亡，係咪地政總署負責先？

至於政政總署，佢哋係咪唔知咩叫「法律不外乎人情」呢？中銀作為黑暴運動嘅受害者，分行經常被暴徒「打砸燒」，囍雨想問下政府有啲咩幫過佢哋？好啦，依家銀行諗方法自保，地政總署好意思叫人拆？等於幾年前有旺角有排檔發生火災，政府會唔會要受害商戶自己清潔返啲灰燼，話啲灰燼阻街呢？好心地政總署就認真諗下發生咩事，唔好對受害者「施加傷害」啦！

向「受害者」踩多一腳

簡單嚟講，地政總署嘅做法，就係要「搞受害者」，呢啲道理真係令其他人摸不著頭腦。其實，政府的確係應該積極執法，但唔係對住啲受害商戶、銀行「積極執法」，而係對積極執法以拘捕暴徒。如果政府咁關心阻街問題，咁地政總署下次見到有商舖被破壞後，啲財物、貨物被暴徒「散」晒出街，請地政總署搵人行出嚟，叫啲暴徒執返好啲嘢，唔好阻街！地政總署敢唔敢咁做？如果唔敢即係代表咩？即係代表地政總署欺善怕惡囉！政府部門呢種唔同情受害商戶、銀行，反而仲要加多腳嘅行為，真係睇到人義憤填膺！ 

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app