一名21歲男子因為涉嫌喺沙田「踐踏國旗、將國旗投入垃圾桶再棄之於城門河中」，被判侮辱國旗罪成，日前喺沙田裁判法院被判200小時社會服務令，裁判官判刑時指「案件控罪嚴重，但沒有相關量刑指引」；另一邊廂，之前就有男子因為喺美國領事館外噴漆，被判監四個月，兩單案相比之下，好多人都認為今次侮辱國旗案明顯過輕，廣男雖然唔係咩法律界人士，但對於法官在判案時稱案件無「相關量刑指引」感到有啲懊惱，案件無量到指引，咁香港除咗行「成文法」，仲有「判例法」，乜香港或者其他普通法地區無案例俾法官參考咩？

有判例可參考

廣男記得自己曾經睇過一本法律「入門」書，入面表示香港本地嘅法律有兩個主要來源，即係「成文法」（Legislation）同「判例法」（Case Law），後者可以對「成文法」嘅條文作出解釋，亦可以對《普通法》嘅一啲原則作出闡釋、演繹同推廣，同埋決定點樣呢啲原則應用到案件嘅具體情況上；除咗香港嘅判例外，所有普通法國家或者地區例如英國、澳洲、新西蘭等嘅司法判例，亦可以喺香港引用。喺今次侮辱國旗案，個裁判官話「沒有相關量刑指引」，咁廣男想問一句，咁有冇案例可借參考、應用呢？

隨手上網搜尋一下有關侮辱國旗案嘅判決，就搵到社運人士古思堯喺先喺2012年、2013年先後「焚燒及塗污國旗」同「塗污國旗及區旗」，被判入獄九個月（先不論個人背景，坐九個月監同社會服務令感覺有極大對比）；到2017年7月、10月以及2018年1月，古思堯又再侮辱國旗、區旗，結果被判監2個月。呢啲侮辱國旗「要坐監」嘅案例，唔知有冇參考同應用到呢？

法官應知道有案例

如果係一般人唔知道判案嘅時候法官可以既參考法例又參考案例，咁都可以理解，但作為裁判官，今次點解唔參考之前嘅侮辱國旗案，然後作出適當、具阻嚇力嘅判決呢？今次侮辱國旗人士獲輕判，會產生一個極壞嘅後果，就係今次案件成為案例，咁以後其他侮辱國旗案有判決時又參考番呢單案，可能變咗侮辱國旗「唔駛坐監」，之後其他示威者會唔會更「願意」仿傚？據報，律政司正研究裁判官嘅判刑理據同主控官嘅報告，然後決定係咪需要跟進，廣男希望，律政司可以慎重考慮係咪就今次案件提出上訴，以彰顯法治、以正視聽！ 

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app