近月黑暴運動係咁升級，汽油彈、炸彈以至「詐彈」都陸續出場。噚日，港鐵就發現輕鐵有路軌出現人為「切割痕跡」，根據形狀同切口，明顯係用工具切割，幸好港鐵人員及時發現及加固，未有導致咩意外發生。囍雨喺度要嚴正聲明，搞鐵路路軌，一旦發生意外，後果不堪設想，隨時發生大規模傷亡；不法之徒想香港「經濟攬炒」已經過分，依家仲想連「人命」都「攬炒」？呢啲恐襲式行為，絕對唔能夠接受！

再次發生鐵路「恐襲」

其實不法之徒已經唔係第一次「恐襲」鐵路，上星期五港鐵發現喺天水圍一個輕鐵站路軌，出現一道裂紋，同樣認為係用工具切割而成，當時港鐵亦即刻進行加固工作，輕鐵服務無受影響，列車亦無因此出現意外；如果大家對近期嘅黑暴運動有印象，應該記得前排喺沙田嘅一次示威當中，就有暴徒將雜物掟落沙田港鐵站路軌。呢幾次「恐襲」式行為只要「有一次」令港鐵、輕鐵列車出意外，分分鐘會搞出大量人命！

如果大家有搭開輕鐵，會知道輕鐵喺元朗、天水圍同屯門一帶行走，除咗係上班族接駁港鐵嘅一種主要交通工具，日常最多使用輕鐵服務嘅市民，唔少都係喺區內出入嘅婦女、老人家、學生甚至小童；一卡輕鐵大約可以容納200人，如果係一卡輕鐵拖住另一卡輕鐵行走，就大約可以容納400個乘客，可以想像得到，如果輕鐵因為呢啲「恐襲」行為而導致出軌或其他意外，會影響到幾多人命安全呢？

向「恐襲」式行為說不！

所以，大家千祈唔好覺得「切割」下輕鐵路軌係好小事，因為對鐵路作出「恐襲」，分分鐘可以危害到數百人嘅生命安全！之前有示威者、暴徒話要喺經濟上同香港「攬炒」，已經令到本港經濟、各行各業受打擊；而家竟然仲有人意圖攞人命嚟「攬炒」，乜危害他人生命安全，係一件公平、正義嘅事咩？各位香港市民，一定要齊聲嚴正譴責黑暴行為，拒絕任何形式嘅攬炒、「恐襲」行為！ 

原圖：港鐵圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app