關於「香港眾志」黃之鋒被DQ（參選提名無效）區選資格一事，廣男噚日同大家分析過，綜觀黃之鋒嘅「搞獨往績」，其實被DQ一早有跡可尋。至於黃之鋒所謂「反駁被DQ」嘅理據，講真，廣男根本無意糾纏。套用一句新華社今日嘅評論，就係黃之鋒根本係一個「徹頭徹尾、如假包換的『港獨分子』」。所以如果問廣男，黃之鋒有冇「預咗」呢個結果，廣男相信一定有，否則都唔會安排Plan B 報名，但佢之所以繼續「去馬」，廣男分析，背後嘅原因就係呢個根本係一場政治操作，而且已經做好「兩手準備」，即係如果成功「入閘」，咁日後其他「港獨分子」都可循此路徑尋求「參賽」；如果被DQ，又不失為一個可以大力攻訐港府、「一國兩制」以至抹黑中央嘅「好機會」。如此睇嚟，黃之鋒、盲反派根本「冇得輸」。

謀為其他「港獨分子」開路

廣男噚日同大家講過，黃之鋒嘅「搞獨」往績，包括曾經大講「定必捍衛將『香港獨立』作為港人自決前途嘅選項」，又喺今年元旦高舉「只有兩國，才有兩制」嘅「港獨」標語衝擊政總，一個咁嘅政客，突然話佢「唔支持港獨」，大家信唔信？可能有人會講，唔通唔畀人「覺今是而昨非」咩？當然冇問題，但廣男又要反問下，黃之鋒除咗不斷「詮釋」佢嘅「自決」理念之外，又做過啲乜野可以令大家信服，佢會真誠擁護《基本法》同特區政府呢？如果黃之鋒都可以成功「入閘」，更大嘅「實質性」作用就係令到其他一脈相承嘅「港獨分子」，日後都可以循此路徑參加各種選舉，因為無論曾經幾死硬、幾激進，只要臨近選舉「突然間痛改前非」，就可能有「參賽資格」；就算被DQ，由於有黃之鋒嘅「成功先例」，又可以大把理由打官司、反政府。

搵藉口攻訐、抹黑政府

咁係咪唔畀黃之鋒「入閘」就冇晒問題呢？並唔係！廣男估計，反政府、反中央嘅「第二手準備」，就係利用事件攻訐港府以至中央。呢兩日佢已經不斷聲稱自己被DQ係「政治打壓」，剝削港人投票選擇嘅權利等等，甚至話係選舉主任「執行北京嘅死任務、硬命令」，總之自己「冇問題」，只係被人政治打壓。接落嚟，相信佢又會不斷將被DQ「發大」嚟炒作，最有可能嘅就係尋求外部勢力介入香港事務甚至煽動英美等國家制裁香港。事實上執筆之時，廣男已經見到美國眾議院議長佩洛西又發貼文「聲援」黃之鋒，聲稱DQ佢係「違反香港法治和『一國兩制』原則」；又有美國議員藉此揚言要盡快通過所謂《香港人權與民主法案》等等。

總括嚟講，廣男認為黃之鋒嘅參選目的，其所意圖達致嘅「指標性」作用隨時大過當選與否嘅實質性作用，就係無論結果如何，黃之鋒、盲反派以至幕後一班亂港勢力都「有嘢」可做，而真正嘅目的，當然又係反政府、抹黑「一國兩制」，甚至劍指特區管治權。至於果啲認為黃之鋒參選會重視基層市民民生福祉嘅人，廣男只可以勸一句，咪天真啦！

https://bit.ly/2kgU8qg

https://www.speakout.hk/app