侮辱國家象徵，近月成為反政府示威者、暴徒嘅指定動作，令人印象最深刻嘅，莫過於喺9月22日，一班示威者喺沙田大會堂旗杆拆咗支國旗落嚟，然後先帶入新城市廣場踐踏塗污「蹂躪」一番，然後又帶出廣場將國旗掟入水池，最後直頭將國旗，掉咗落城門河，一班示威者「侮辱得高興」。當大家以為法庭會嚴懲涉事者時，原來侮辱國家象徵，係唔駛坐監嘅，判二百小時社會服務令就可以；囍雨好奇，點解之前有人喺美國領事館外牆噴字要坐四星期監，但擺明侮辱國家象徵，就連一星期監都唔駛坐呢？

控罪嚴重 但判社會服務令？

對於呢單21歲被告擺明侮辱國家象徵但獲輕判嘅新聞，令到好多人都好驚訝，因為之前有人喺美國領事館噴字，就原本被判監六星期，減埋刑都要判監四星期；案情為持雙程證內地男子喺美國領事館本來諗住喺外牆噴上「中國必勝」四字，點知連個「勝」字都未噴好，就俾人阻止同拘捕，之後仲被判監。兩單案對比，邊單案情嚴重啲？

先論案件嚴重性，唔同人可能有唔同觀感，但美國領事館噴漆，可以話係塗鴉，無踐踏人哋美國國旗等國家象徵，但今次一班示威者擺明要侮辱國旗，甚至可以話係要「玩謝」支國旗，嚴重踐踏國家象徵，係咪侮辱國旗嘅罪行嚴重啲呢？退一步講，就當兩件事案件嚴重性相近，咁點解喺中國香港，侮辱美國領事館，最後懲罰又會輕過侮辱中國國旗嘅呢？係咪中國國旗可侮辱，美國領事館碰不得先？如果你問囍雨，囍雨一定會答你唔公道！

律政司應考慮上訴

鑑於案件嚴重性，同埋同其他案件比較極度不對稱，囍雨覺得律政司應該研究下判詞，考慮下係咪應該就案件判刑上訴。律政司做嘢，以法律為考量；而囍雨從判決對社會影響嘅角度睇，當其他反政府人士、示威者甚至暴徒「知道」，原來侮辱國旗係判得咁輕嘅，咁佢哋以後去示威、抗爭，仲會因為刑罰而唔敢侮辱國旗咩？佢哋分分鐘會覺得，如果侮辱國旗判刑都係咁輕，下次必然要再「玩盡啲」，呢個情況又係咪大家想見到呢？ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app