喺呢個政治大於一切嘅年代，大家往往會發現有啲政客、媒體，永遠都係雙重標準，對於警方執法，佢哋會批評為「警暴」，但暴徒打砸搶燒呢，佢哋又竟然會形容為「義士抗暴」同「以武制暴」；最近，囍雨睇到兩單《生果報》嘅新聞都幾有趣，內容係關於質疑警方就警察、警察家屬被起底一事申請禁制令，《生果報》一時引述受訪者稱「禁制令變相立下辱警罪」，一時又稱「範圍太闊」云云；囍雨剩係想問一句，《生果報》要保護記者就申請禁制令，咁警隊係咪都要保護返自己啲警員同家屬呢？

凡是警方的都要「反對」

睇返呢幾日《生果報》關於警方就警察、其家屬被起底嘅問題向法庭申請臨時禁制令嘅新聞，《生果報》有一單就話〈盧偉聰申請 法庭頒臨時令 禁起警察及家屬底 大狀指範圍太闊記協斥損知情權〉，另外有一單就話〈「煩擾」警察同被禁 大律師形容「起底」禁制令變相立下辱警罪〉，簡單嚟講，就係由唔同角度出發，質疑警方呢個申請「有問題」囉！

撇除禁制範圍或者法庭修訂禁制令呢啲較技術嘅問題唔講，囍雨有個疑問，就係《生果報》記者被起底，部分員工個人資料俾擺晒上網，《生果報》都有向法庭申請同取得臨時禁制令；大家又要諗下，《生果報》以至其他媒體嘅員工、記者，當然受法律保護啦，同一道理，警方申請禁制令保護返警員、警員家屬，其實又係咪好合理呢？

要保護警員家人 尤其是兒童

值得留意嘅係，警方申請嘅禁制令，除咗保護警員之外，亦包括近期同樣慘遭起底嘅警員家屬，佢哋有啲係婦女，有啲甚至係小童，如果社會其他人士嘅私隱要受到保護，社會係咪更加應該保護呢啲未成年嘅少年或者兒童呢？對於警方執法問題，就算有任何意見，都應該「禍不及妻兒」嘛？更重要嘅係，法律面前，人人平等，你有權申請禁制令，我亦有權作出申請，如果連法庭決定都想質疑，係咪尊重法治呢？

喺呢啲關乎法治、個人私隱嘅問題上，囍雨覺得大家實在無需要借機炒作，公眾知情同起底欺凌係兩回事，而且法庭亦已經修訂禁制令內容；同埋今日警員、警員家人被起底，聽日有邊個俾人起底都係「未知之數」，一方面傾向反對警方而無視法理，對社會甚至對自己都未必係好事！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app