過去呢個週末，香港繼續儼如「黑暴天下」。週六雖然相對「平靜」，但入夜後一批暴徒就去到元朗生事；到噚日，大批暴徒再度侵襲九龍，喺多區「例牌」大肆破壞，包括燒港鐵站、毀店鋪、砸銀行、周街掟汽油彈、縱火、襲警同埋「私了」市民等，一直擾攘到今日凌晨。囍雨想講，時至今日喺黑暴恐怖籠罩之下嘅香港，廣大市民面對嘅已經唔單只係「放假有冇得去街」、「邊度會堵路、唔方便」，而係隨時都可能有生命危險；面對呢班不擇手段、不計後果嘅暴徒，政府、警方係咪應該考慮以更有力、更有效嘅方式盡快止暴制亂呢？

燒港鐵站 向鐵路軌掟雜物

囍雨睇新聞，一系列嚴重暴力主要發生喺噚日嘅九龍區。由當日下晝三點左右開始，一批「示威者」就喺尖沙咀一帶非法集結（冇向警方申請過），現場仲有人分派口罩、衣物等物資。儘管防暴警今次提早介入執法，驅散示威者，但就引嚟暴徒不滿，除咗百般辱罵警察外，更一度有百幾人包圍警員，向佢哋掟雜物，又以雨傘等硬物圍毆、襲警。之後，黑衣暴徒藉着仇警情緒高漲之際，鼓動眾人行出梳士巴利道，堵路發洩。防暴警舉旗警告無效下，施放多枚催淚彈驅散人群。但暴徒其後流竄至油尖旺、土瓜灣、紅磡及深水埗等多區繼續集結，繼續重演過往向港鐵站、警署、店舖投擲汽油彈、縱火等戲碼。令人髮指嘅係，有人竟然向東鐵路軌投擲雜物，嚴重影響鐵路系統嘅安全運行。

去到傍晚，暴徒再次將矛頭指向港鐵站，大肆破壞九龍沿線多個港鐵站設施。其中旺角站再次成為重災區，甚至有暴徒罔顧站內仍有乘客出入，於B2出入口向站內投擲燃燒彈縱火，站內一片火光，不斷冒出大量濃煙，以至有乘客需要職員協助逃生，險象環生。另一邊廂，旺角站另外多個出入口處都被暴徒堆放雜物縱火。噚日除咗旺角站之外，油麻地、何文田等站亦都相繼遭受唔同程度嘅破壞，甚至被迫關站。

過路市民險中汽油彈

入夜之後，暴徒仍未收手，繼續破壞目標店鋪、銀行，又當街隨意縱火、掟汽油彈。其中，暴徒喺佐敦撬開一間連鎖零食店閘門，並入內大肆破壞、縱火，完全唔理火勢有可能波及樓上民居；喺彌敦道向行車路掟汽油彈，完全唔顧行駛中車輛嘅安全；而喺深水埗警署外，兩個路過途人更加差啲被暴徒掟嘅汽油彈擊中。面對呢啲暴行，或者又會有人拋出「死物論」，但大家要諗，喺「死物」被破壞嘅背後，真正受威脅嘅，咪就正正係一條條活生生嘅人命咩？

講句「撐警」 又被私了

而令囍雨更加難受嘅，就係過去兩日都繼續有多位市民被暴徒行私刑。噚晚近九點，一個「國語男」因為喺旺角彌敦道一帶「被懷疑」影暴徒大頭相，就被一批包圍、搶手機強行刪相，仲被拳打腳踢打至頭破血流；喺朗豪坊對開，窩打老道，又先後有男子因為「被懷疑有可疑」，被暴徒當「沙包」咁打。而除咗噚晚至少三名市民被「私了」之外，前晚喺元朗一帶，一位港足前門將就因為撐警，講咗句「警察加油」，就被一班黑衣蒙面暴徒追擊，並按倒地上將其打到流血。

其實每個週末睇住呢啲暴行「如期上演」，唔知大家係咩感受，囍雨就除咗心痛之外，仲有好大嘅無力感。尤其係《禁蒙面法》通過之後，或者暴徒人數少咗，但暴力程度就似乎並無減低過，仲反而升級咗；而且依家暴徒嘅心態明顯就係唔怕警察、挑釁警察直至襲警、「殺警」，而當佢哋大肆破壞、行私刑嘅時候，就係「明知違法而為之」，仲有人「撐傘掩護」。囍雨喺度諗，大家都眼見依家暴徒嘅「手法」有所轉變，而且心態上完全視法律如無物，喺咁嘅情形之下，政府同執法部門，係咪都應該思考轉變「戰術」、強力執法呢？暴徒暴力唔會自己停，止暴制亂如果唔能夠「治本」，暴力只會沒完沒了。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app