喺廣男中學時代，最Hit、最賣座嘅一套電影叫《鐵達尼號》，一對喺船上認識、邂逅嘅情侶，喺一條號稱「永不沉沒的巨輪」上，發展出一段驚天地、泣鬼神嘅愛情故事，主角一句「You jump, I jump」，更成為愛情電影嘅永恆經典對白。呢種「至死不渝」嘅感覺，廣男近日竟然喺一篇《生果報》嘅報道「搵到」，《生果報》一篇題為〈蘋人誌：今生只嫁前線巴〉嘅專訪，身為「暴徒」嘅男女主角，矢言就算對方被捕、被判監十年，都會「等對方」，睇到人唔多唔少都有啲感觸，但感觸還感觸，廣男想問一句，其實有必要咁做咩？

今生只嫁前線巴？

呢篇所謂〈今生只嫁前線巴〉嘅報道，好明顯係秉承咗《生果報》之前嘅專訪，將「暴徒」故事美化到令人覺得好「感動」啦；今次故事主角係一對喺男女喺連儂牆上重遇，發展成情侶，一齊走上「前線」嘅故事，《生果報》仲以「兩人雙劍合璧，成功征伐無數戰場，然後全身而退」形容呢對「亂世佳人」。

喺呢篇報道尾聲，報道話男女主角唔止一次提到「似有還無」嘅未來，男方話就算佢俾人拉，女方都唔可以俾人拉，「唔好上去救我，你安全嘅話，可以幫我處理後事，咁我先有最大機會冇事」，而女方「沉默半晌」，不安地一邊玩手指，一邊同記者講，「我之前同佢講過，如果佢咁唔好彩俾人告暴動要坐十年，我會等佢」，而男方就話「我都會」。《生果報》篇專訪嘅結尾係，男方望住略帶顫抖嘅女方，「想也不想，許下承諾」。

《生果報》又塗脂抹粉

對於《生果報》呢篇「驚天地，泣鬼神」嘅愛情故事，「感觸」還「感觸」，但廣男又係果個問題，《生果報》擺明又喺度美化同浪漫化暴徒，掟汽油彈、做暴徒如果真係咁浪漫、咁型，點解《生果報》老闆黎智英唔帶埋家中老少出嚟一齊做「火魔法師」呢？如果暴力抗爭係咁好，點解連美國都要叫香港班示威者唔好用「暴力」？《生果報》出呢啲美化暴徒嘅故事，客觀效果就係令人覺得做暴徒「好正義」、「無問題」，結果就係更多年輕人「中毒」被洗腦，參與「黑暴運動」！

至於今次接受《生果報》專訪嘅「亂世情侶」，你哋話「有事」會等對方十年，但十年係一個咩概念？為咗「抗爭」，值得十年青春？值得前程盡毁？值得同最愛嘅人分離？《鐵達尼號》係好淒美，但淒美之處在於，男女主角最後陰陽相隔，女主角剩低嘅，就只有回憶 …… 其實佢哋想愛得轟烈，好簡單，只要唔犯法咪可以長相廝守囉，唔洗搞咁多嘢吖！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app