暴徒近月發起黑暴運動，四處打砸搶燒，囍雨覺得一班暴徒之所以有恃無恐，全因為佢哋有三大「後盾」，第一就係部分香港市民嘅支持，第二就係盲反派政客、媒體極力維護同「美化」佢哋，第三就係「超級強國」美國嘅政要、政客都話同佢哋「同行」；囍雨今日睇新聞，見到美國副總統彭斯表示美方與香港「並肩而行」，請求示威者「留在非暴力示威的道路之上」。其實，依家啲暴徒好明顯係極度暴力，彭斯以至美國，點解唔譴責下暴徒暴力呢？

支持暴徒 劍指中國？

根據傳媒報道，美國副總統彭斯喺一個活動上，猛烈批評中國政府，然後話鋒一轉就講香港，話美國「站在自由一方」，強調美方同香港「並肩而行」，請求香港（示威者）「留在非暴力示威的道路之上」。簡單而言，彭斯一番說話，一邊係將矛頭直指中國，一邊係表示支持香港示威者，前提係叫班示威者要做「和理非」。

誠如內地媒體評論所指，彭斯一番說話，首先就係給中國扣上「帽子」，繼而就係借台灣、香港等問題抹黑中國、干涉中國內政。囍雨就覺得，彭斯嘅言論，絕對係連消帶打，全面打擊中國；先講中國，觀乎彭斯嘅言論，就係喺制度、法治等攻擊中國，而當佢講到香港嘅時候，稱如果中國以暴力鎮壓香港示威，中美貿易唔會達成協議，俾人感覺就係美國唔單止支持香港，甚至將香港擺上貿易戰嘅談判桌上。

美國不應支持暴徒！

囍雨覺得，彭斯對香港嘅一番判斷有極嚴重嘅錯誤！首先，彭斯要搞清楚，如果香港嘅示威者甚至暴徒係和平示威或者「和理非」，莫講話中國無需要做咩動作，就算係香港警察，都可以話唔駛點「做嘢」；香港嘅黑暴運動發展到今日，係因為有暴徒到處打砸搶燒，打爛店舖、破壞鐵路、襲擊平民甚至企圖「謀殺」警察等等，彭斯與其支持香港示威者，叫佢哋要「和理非」，點解唔直接指出示威者好暴力，叫佢停手，甚至譴責佢哋呢？

囍雨絕對唔相信，彭斯身為美國副總統，會完全唔知香港班暴徒有幾暴力，彭斯之所叫香港班示威者要「非暴力」或者「和理非」，完全係因為佢知道香港班暴徒已經太暴力，如果唔制止佢哋，會削弱美國政界對香港示威者嘅支持。咁點解彭斯要美國政界等繼續支持香港班示威者呢？原因好簡單，無咗香港呢隻棋，美國又點再搵其他「缺口」，借機搞中國呢？你以為美國支持香港？美國係借香港搞中國啫！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app