香港近月亂象頻頻、暴動不絕，囍雨覺得暴亂到今日都未停，除咗因為暴徒本身「勇武」之外，其實同政客、外國勢力「支持」嘅關係極大。講前者，大家可以睇到盲反派政客、媒體到今日都仲係包庇緊嘅暴徒，完全無割席；講後者，不少外國政要、政客到今日都依然要支持暴徒，有啲仲聲稱要同香港「同行」。囍雨睇新聞，又見到《生果報》老闆黎智英喺美國展開「唱衰」之旅，美國參選員仲對黎智英表達對「香港暴力」嘅關注；囍雨覺得好奇怪，暴徒暴力，外國關注，點解要同黎智英講呢？係咪黎智英有咩特別角色？

外國政客關注暴力、汽油彈

根據返《生果報》自己嘅報道，黎智英一行人會見幾名美國共和黨參議員，會後黎智英話對方關注、擔心「香港暴力升級」、「想我哋維持喺唔好咁暴力情形下抗爭」，仲留意到有「投擲汽油彈」嘅情況。問題就嚟喇，外國參選員關注「香港暴力升級」（明顯係講緊暴徒啦），點解唔同特區政府講，唔同香港盲反派班議員或者政客講，而要同黎智英講呢？

囍雨就認為，美國參選員之所以「選擇」同黎智英講，可能因為佢哋相信黎智英喺香港盲反派裡面扮演好重要嘅角色；如果你問囍雨，分分鐘可能因為黎智英就係香港盲反派派「金主」、「共主」甚至「黨鞭」。話雖如此，囍雨覺得美國參議員對黎智英講呢啲，真係未必有用，因為由六月到依家，最用力煽風點火，不斷美化暴徒嘅，正正就係黎智英同佢旗下嘅《生果報》！

美國不與暴徒割席？

睇相關報道，仲令囍雨產生另一問題，既然美國啲參議員都知道香港嘅暴徒好暴力，甚至連汽油彈都出埋，咁點解仲要咁大力支持香港班示威者或者暴徒呢？當中原因，其實非常簡單，因為佢哋嘅目標好清晰，就係中國！中美貿易戰陰晴不定、時好時壞，美國不斷搵「缺口」攻擊中國，之前有華為等中國企業，依家香港出現反修例行動，佢哋如果唔借機打擊下港府、中國，咁咪好「浪費」？所以，「支持」香港示威者、暴徒係表面理由，搞中國先係真！

喺呢個國際局勢咁複雜嘅情況下，香港人如果不惜一切投入暴力「抗爭」，到最後都可能只係政客、媒體利用嘅政治棋子；就如大家唔會見到黎智英、同埋佢嘅家人去衝一樣，要負刑責嘅事，都係其他人、其他人嘅子女做好啲！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app