喺廣男嘅求學時代，成班同學不論男女都好鍾意睇台劇，不過投身社會以後工作較忙，少咗好多時間睇劇，睇台劇就更加少；最近因為網上大量好評，廣男就好奇睇咗套叫《我們與惡的距離》嘅台劇，內容講述台灣出現「隨機殺人案」令社會嘩然，社會對殺人案都義憤填膺，殺人犯嘅家人被針對，一係改名換姓，一係就「避世」，就算係犯人嘅代表律師，都被社會針對，一個講求公義嘅社會，對罪惡「零容忍」，甚至要禍及家人；但回到現實嘅台灣，竟然有政府「管制」通輯犯陳同佳入境自首，借殺人案大耍政治，執政民進黨「與惡的距離」，廣男覺得實在係「無幾多」！

台灣殺人案時間表

今日廣男睇Facebook，見到台灣嘅總統蔡英文喺社交平台上大大隻字寫住「香港不辦，我們來辦」、「只有逮捕，沒有自首」、「維護主權，伸張正義」，一副義正詞嚴嘅姿態，廣男就覺得，當台灣嘅民進黨當局唔講司法管轄權、唔講自己想「跨境執法」，而喺度講「主權」、「正義」嘅時候，即係擺明玩政治、所謂「主權」行先，同佢哋講道理，係無用嘅，所以廣男喺度就講下喺陳同佳案入面，一啲好關鍵嘅時序。

自案發以來，其實2018年12月台北士林地檢署已經對陳同佳發出通緝令，又致函「法務部」轉請「陸委會」向特區政府請求移交陳同佳到台灣受審；2019年2月，特區政府提出修訂《逃犯條例》，但之後因為「政治」問題，台灣嘅陸委會表明唔會喺修例前提下同意陳同佳嘅移交；直到近日，陳同佳其實喺香港出獄前已表達過願意去台灣自首，但台灣嘅陸委會就話無司法互助，台灣有必要「管制相關人員」包括陳同佳入境；直到噚日，台灣就話會派人嚟香港押解陳同佳到台灣受審。

簡單嚟講，就係港府想修例處理陳同佳案，台灣唔接受，之後陳同佳願意到台灣自首，台灣亦唔接受，直到輿論對民進黨可能不利，佢就話嚟香港「跨境執法」，而蔡英文就以「香港不辦，我們來辦」形容做法，仲聲稱自己「伸張正義」。

政治凌駕法治 公義排最後

當台灣聲稱自己「伸張正義」嘅時候，廣男覺得根本就係笑話，如果真心為正義、公義，乜呢個世界有阻止通緝犯自首嘅道理咩？又有為咗法治就去人哋度「跨境執法」嘅道理咩？認真講，台灣嘅民進黨政府，根本就將事件當作係一場政治操作，將案件綁上「主權」問題，為嘅又係選舉。台灣嘅陸委會講得啱，香港唔應該俾殺人犯「到處行走」，但香港之所以咁做，係因為殺人犯喺台灣殺人，但台灣「管制」佢入境，阻止佢嚟投案或者自首嘛！當一個將政治凌駕公義嘅政府，話自己係「伸張正義」嘅時候，大家仲有咩好講？公義，對蔡英文、民進黨嚟講，根本就排喺好後，必定排喺政治、選舉之後！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app