早前中大校長段崇智喺公開對話中被學生「批鬥」之後，就發公開信「撐學生」、「譴責警暴」，但信中就冇半句譴責暴徒暴力，呢種「冇腰骨」嘅做法引嚟唔少批評，亦都造成極壞先例。囍雨今日就見到，繼中大之後，港大一班學生都「有樣學樣」，噚日喺校園裡面聚眾搞「逼宮」，提出「要求校方答應譴責警方」等多個「訴求」。囍雨就喺度諗，如果港大校方又「跪低」，結果會點？最大嘅可能性，就係令到其他大學、院校嘅學生覺得「呢招掂」，然後不斷喺自己嘅學校裡面「複製中大模式」。大家諗下，呢種「連鎖效應」一旦產生，同「綁架」所有大專院校去反政府有咩分別？

囍雨咁講，係因為學生提出嘅所謂「訴求」根本唔合理，例如噚日港大學生就提出「要求校方答應譴責警方」、「承諾唔容許警方入校搜捕」、「為被捕學生提供支援及舉行對話會」等，而且發動聯署嘅學生仲對校方下「死線」，揚言校方喺10月28日前冇回覆，會商討「升級行動」，但如果校方「有回應，港大同學會從善如流」。囍雨覺得呢種講法其實語帶威脅，大家諗下，如果校方到時唔表態、或者唔接受學生「訴求」，最後會點？囍雨就話，到時班學生咪又好似中大學生咁，搞「批鬥校長大會」囉。

圖將黑暴運動「反黑為白」

所以大家要諗，點解依家啲大學生、校友以至呢場反政府運動嘅「幕後搞手」，頻頻咬住各大專院校嘅校長唔放、成日逼佢哋支持「訴求」、譴責警方呢？囍雨就質疑，呢啲人根本唔係志在「學校支援」，而係通過壓迫校長表態，將呢場黑暴運動嘅違法行為反黑為白，繼而確立運動的「正當性」，以「鼓動」更多學生加入違法甚至暴力嘅隊伍。而另一方面，又可以通過逼校長、校方表態、歸邊，變相將學校擺喺反修例、反政府嘅一方。就好似中大校長段崇智咁，當佢「關懷學生」嘅同時，大家又睇下佢有冇譴責過暴徒暴力、教導啲學生唔好去犯法呢？冇！於是自然就會令班學生覺得，只要自己「夠惡」，校長都會「就範、屈服」，「企埋同一邊」。

一味迎合學生嘅惡果

其實呢種歪風擴散開去，後果可以相當嚴重。如果身為校長、教育者，一味只係迎合學生嘅「訴求」，而唔係教導佢哋明辨是非，或者可以換嚟學生一時嘅滿意，但下次呢？當學生又有「訴求」，而學校冇法令佢哋「滿意」嘅時候，會有咩後果？浸大校長錢大康就係一個「好例子」，當時佢哋嘅學生會長因為「觀星筆」事件被拘捕，錢大康第一時間表達「關懷」，但等到之後學生得寸進尺、提出更多要求時，錢大康一旦無法滿足，就畀班暴力學生打爛辦公室。事件足以說明，面對暴力、違法，如果你唔企硬反對，咁下一次你就可能成為暴力違法嘅受害者。身為教育者，唔通呢個淺白嘅道理都唔明？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app