喺呢個價值觀極度扭曲，打砸搶燒可以被認為係「義士」嘅年代，只要係反政府、反中央嘅人，就算幾錯、幾離譜，一樣可以俾人捧到「天咁高」；好似被稱為新生代「漢奸」嘅「香港眾志」黃之鋒咁，近日坊間就流傳住一份何文田某中學嘅通識教材，竟然將屬「自決」派嘅黃之鋒列入「中華傳統美德格言及名人系列」。廣男實在唔明白，黃之鋒同「中華傳統美德」有咩關係；尤其甚者，廣男對於黃之鋒認唔認自己係中國人，都甚有保留。

反中、違法是「傳統美德」？

呢份相信係基督教女青年會丘佐榮中學嘅通識教材，將黃之鋒列入「中華傳統美德格言及名人系列」，「論據」包括黃之鋒喺2012年就帶領「學民思潮」反國敎以及2014年參加違法佔領等等。如果講前者，一個反對「德育及國民教育」嘅政客，佢嘅「中華傳統美德」喺邊呢？如果講後者，大家都知道黃之鋒喺2014年9月26日煽動學生違法衝擊政府總部東翼前地，佢本人之後都被定罪甚至坐埋監，咁一個違法衝擊嘅政客，「美德」又何在？

誠如某教育界人士所言，如果將黃之鋒作為一個負面人物、反面教材，咁反而可以接受；但呢份教材就「反其道而行」，將違法、反中、反對德育及國民教育嘅人列為「中華傳統美德格言及名人系列」，咁係咪即係想話俾學生聽，要成為「中華傳統美德『名人』」，首先要識得反對自己國家，又要識得違法衝擊呢？廣男就覺得，呢份所謂教材，名符其實係一份典型嘅反面教材就真！

黃之鋒不認自己為中國人

再者，當份教材要將黃之鋒列為「中華傳統美德『名人』」嘅時候，大家都要問下，黃之鋒係咪中國人，或者佢認唔認自己係中國人先？廣男平時睇開新聞，最多都係聽到黃之鋒話自己係香港人；有傳媒就報道過，黃之鋒自認「是香港人，也是華人，卻不是中國人」，當一個人連中國人都唔認，或者覺得中國人呢個字係被「操控」，將佢列為「中華傳統美德『名人』」，其實會唔會連黃之鋒本人都想反對呢？

今日嘅香港教育，同個社會一樣咁扭曲，洗腦、偏頗內容頻頻出現；廣男想講，當學校成為反政府嘅「洗腦」基地，可能好快大家身邊嘅年輕人，都會被洗腦，成為違法、反中嘅「中華傳統」少年！ 

黃之鋒已報名參選區議會選舉海怡西選區，其他參選人包括新民黨陳家珮、民主派代表林浩波。 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app