曾揚言「為美國而戰」嘅《生果報》老闆黎智英，近期不斷高調露面，喺香港就不斷同盲反派人士接觸、走上街頭，喺外國就高調見外國政要、接受外媒訪問；最近，佢又喺美國發表公開言論，稱香港「兩代人從未如此團結」，內地、內地人要「買掉香港的法治、自由、人權、新聞自由，所有制度價值」云云。囍雨想講，想「買掉」香港法治、自由嘅人，唔係咩內地、港府，而係近月不斷破壞、不斷衝擊法治嘅暴徒，當中包括一直煽風點火、煽動抗爭嘅《生果報》同黎智英！

英國留下法治 你們大肆破壞！

同之前嘅公開言論一樣，黎智英喺美國史丹佛大學胡佛研究所嘅晚宴上，都用相同「論調」指香港同美國一樣珍重自由價值，秉承佢之前話自己「為美國而戰」嘅宣傳手法；囍雨留意到，黎智英仲特登點出「港英政府沒有給予香港民主，但留下開放的制度，香港享有集會及言論自由，是自由社會」。港英政府，的確留低咗啲「資產」俾香港，囍雨覺得，當中有一樣好重要嘅嘢，叫法治，而法治喺近月卻因為黑暴行動受到嚴重挑戰！

當黎智英話內地、內地人要「買掉」香港法治、自由嘅時候，事實真係咁樣咩？講法治，近月示威者、暴徒由遊行，升級到掟磚、掟鐵枝，之後玩汽油彈「殺警」，近日仲連炸彈都出埋，周圍打砸搶燒，呢啲唔係破壞法治？係內地、港府要「奪走」法治，定係暴徒同煽動者破壞法治呀黎智英？再講自由，依家香港人連返工放工、返學放學、放假出街都受到黑暴行動影響，有唔少市民甚至被暴徒圍毆「私了」，又係邊個影響緊香港嘅自由呀？

當黎智英敢講法治、自由嘅時候，大家真係要問下黎智英，佢係支持破壞香港法治、自由嘅黑暴行動，定係反對、譴責黑暴行動先？今日又有傳媒報道，黎智英喺美國見幾個共和黨參議員，對方表明關注暴力，又留意到投擲汽油彈嘅情況，黎智英仲夠膽「講大話」，稱情況有所和緩，仲話要對方支持啲「暴徒」，咁佢哋就唔會咁易走向暴力。好明顯，黎智英係存心包庇、縱容黑暴行動，仲要向外國「虛報」情況！

黎智英家人為何不參與「動容」抗爭？

最離譜嘅地方係，就算依家有咁多後生仔被捕、起訴，黎智英仲要擺出一副好鼓勵抗爭嘅姿態，稱「香港年輕人為了抗爭，不惜犧牲性命，令不少人為之動容，亦是港人團結的原因」，如果出嚟抗爭咁令人「為之動容」，囍雨又想問下，黎智英會唔會帶埋家中年輕人，出嚟參與啲令人「動容」嘅抗爭、暴力行動呢？煽動他人總係容易，因為自己、自己家人唔駛付出代價，但咁就形同推人哋嘅子女「上戰場」、做炮灰，點解黎智英明知成為暴徒嘅年輕人會前程盡毁，仲要咁做？

囍雨認為，關鍵在於黎智英最想做嘅，唔係爭取咩普選，而可能係想推倒港府甚至國家嘅政權，大家可以話佢「為美國而戰」、要打「新冷戰」，亦可以由佢今次喺美國發言，稱內地人「只待一個觸發人民爆發的時機」看出偽端，簡單嚟講就係顛覆國家。其實，《生果報》、黎智英成日將反修例行動提升至「戰爭」、「冷戰」層面，不斷煽動年輕出嚟抗爭，講到底，就係想香港、中國亂；就算再多嘅年輕人犧牲，對黎智英而言，都可能只係少咗一隻棋，僅此而矣！ 

原圖： RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app