中大校長段崇智一封公開信，近日成為社會熱議話題，一邊廂有人大讚段崇智「撐」學生，但另一邊廂，就有唔少人批評段崇智剩係幫學生講嘢，而忽略佢地涉嫌違法嘅事實。廣男睇晒段崇智成封公開信，基本上睇唔到有一句係譴責示威者或者暴徒暴力，亦無一句講過學生可能做錯事；為人師表，一味迎合學生，而唔確切指正佢哋可能犯法、做錯事，咁對學生真係好咩？

經查證後須譴責警方？

段崇智呢封公開信之所以引起咁大關注，尤其係支持警方執法嘅人反對，廣男相信當中最大原因，係段崇智一句「對於部分警務人員涉嫌不當使用暴力或違反人權，經查證後須予以譴責」；老實講，段崇智想幫學生作出投訴，咁可能係佢覺得自己身為校長應該為學生「做啲嘢」，但廣男想問一個問題，就係唔知段崇智有冇了解過班學生因為咩事被捕，例如有冇涉及暴動、襲警、非法集結、縱火以至刑事毁壞等等呢？

關心學生，完全無問題，但廣男想提出一點，班學生除咗可能係投訴警察嘅「投訴人」，被捕學生嘅另一個身份，其實係疑犯；段崇智作為大學校長、教授、教育工作者，如果知道學生涉嫌違法，大家就要關心下段崇智到底有冇點出學生可能犯錯，而且係可能招致刑責嘅錯呢？

為何不點出學生過錯？

廣男睇晒段崇智成封公開信，唯一搵到較相似嘅說法，就係一句「不斷升級的暴力及破壞行為必須停止，政府必須盡快、盡力提出可行方案解決社會上各種問題」，即係話，段崇智除咗反對暴力，佢無講過學生可能犯錯、犯法，亦無譴責過示威者、暴徒嘅暴力行為，如果身為教育者，對學生所犯過錯會默不作聲，而一味表示要聲援佢哋，包庇佢哋，最可能引致嘅結果，就係更多學生認為自己「無做錯」、「抗爭有理」，最後就只會錯落去。

黑暴行動持續咗幾個月，暴徒暴力不斷升級，但綜觀近月新聞，唔少教育界人士不但無譴責暴徒暴力，反而一次又一次對涉及犯事嘅學生作出袒護；保護學生、想教返好學生，其實無問題，但如果唔直接點出佢哋可能犯下彌天大錯，而只係一味「保護」，廣男想講句，咁係害咗佢哋，唔係幫緊佢哋！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app