暴徒暴力趨於失控，囍雨認為最主要嘅特徵就係「不擇手段、不顧後果」，尤其最近一段時間，暴徒呢種瘋狂心態可謂表露無遺。睇過噚日（20/10）嘅暴力衝突後，囍雨發覺，暴徒現時已經唔單止「惡」，而且變得更加囂張。因為除咗「例牌」打砸燒之外，有人竟然喺警署門口小便、仲有人喺天橋居高臨下向橋下警員掟汽油彈、甚至有人截查消防、救護車輛「搜捕」防暴警等等，即係話，暴徒已經由之前「打完即走」，發展到依家夠膽「陣前挑釁」甚至「追住」警察嚟打。囍雨想講，照咁發展落去，呢種恐襲級暴力嘅必然結果就係搞出人命。

撬門強闖 銀行內放火

民陣噚日搞嘅所謂「九龍區遊行」，一如所料演變成「恐襲九龍」，而且今次仲擺明陣勢由黑衣暴力搖旗開路，一路由尖沙咀「殺」到荔枝角，所經之處必然打、砸、燒，而且專門針對中資商舖、銀行、書局、港鐵以至警署。例如暴徒沿路至少向5個港鐵站投擲汽油彈，其中喺旺角，數個出入口都相繼著火，火舌一度數米高；喺旺角山東街，有暴徒「掘」出交通燈控制箱縱火，更傳出多下爆炸聲；而沿路嘅中資商舖、銀行已經拉閘及加設圍板都根本於事無補，今次直頭有暴徒撬開門閘，強闖一間中資銀行室內放火、掟汽油彈，務求「徹底破壞」。

警署外小便 截查消防車

此外，暴徒針對警員嘅暴行就更加令人髮指。電視畫面所見，一名暴徒囂張到公然喺尖沙咀警署大門外小便，辱警行徑極盡挑釁；另據媒體報道，噚日一批防暴警喺太子一帶布防時，3個暴徒竄上天橋，居高臨下向橋下警員掟汽油彈，其中一枚喺警員腳邊爆開，險「中彈」警員幾乎變「火人」；而喺荔枝角道馬路，就再度發現疑似用嚟伏擊警員嘅遙控炸彈裝置，需要警方拆彈專家到場引爆。講到最令囍雨覺得難以置信嘅，就係噚日竟然有暴徒當街截查及阻礙消防及救護車輛，意圖「搜捕」防暴警。事緣當日有傳「數名防暴警疑由救護車中走出」，引起暴徒「無限聯想」，於是一班暴徒喺尖沙咀一帶攔車查人。

大家認為呢啲暴徒行為又反映佢哋咩心態？囍雨就認為，暴徒依家唔單止視法紀為無物，而且連執法者通通已經「唔放在眼內」，甚至擺到明「就係要襲擊警察」。囍雨想講，呢種心態可謂相當危險，大家唔好忘記，之前已經有疑兇「埋身」割頸意圖殺警、起飛腳踢警仲想搶槍、又有遙控炸彈伏擊警車等等。當暴徒愈嚟愈「唔怕警」、囂張之時，其實無論係警員、市民以至成個社會亦會愈嚟愈危險。噚日就至少又有三位正義市民被「私了」，其中一位阻止暴徒塗污警徽嘅男士喺尖沙咀被圍毆噴漆；一位中年女士就因為指責暴徒而被黑漆噴面……

大眾愈縱容 暴徒愈猖狂

囍雨想講嘅係，時至今日止暴制亂效果未理想，其中一個關鍵因素係「撐警制暴」嘅民意仲未夠強大，當破壞社會安寧仲有人「理解」，辱警、襲警、傷警反而冇乜人譴責時，換嚟嘅結果就係暴徒更加得戚，暴力不斷升級。囍雨睇到噚日一輛滿載汽油彈（至少42枚）嘅車輛被警方截獲，大家應該諗下，如果呢啲「彈藥」順利運上戰場、送到暴徒手中，後果會係點？希望大家明白，依家警隊堅守緊保護香港嘅最後防線，努力保護緊市民安全，但同時佢哋亦都需要大家嘅理解同！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app