近月全球各地都爆發示威，好似喺加泰羅尼亞巴塞隆那，就有「獨立派」示威者發起堵路、佔據機場、縱火等等；而英國倫敦亦有環保組織嘅成員爬上地鐵車頂抗議，引嚟乘客震怒將佢拉落地圍毆，以上嘅畫面似曾相識，唔知大家有無覺得同香港嘅黑暴運動相似呢？無錯，加泰羅尼亞同倫敦嘅示威者已經說明，行動係受到香港示威嘅啟發，香港嘅「黑暴病毒」，似乎已經「傳染」到世界各地。之前仲有外國政客「食花生」話同情、支持及理解香港示威者，依家黑暴浪潮殺到埋身，唔知佢地係咪仲要覺得要為香港暴徒撐腰呢？他朝君體也相同，如果其他地方相繼出現類似香港嘅反政府示威，各地政府係咪仲會覺得「黑暴」有理？

英國引用舊例鎮壓示威

對於香港嘅黑暴運動，英國政客經常講風涼說話，之前英國外相藍韜文（Dominic Raab）就話，香港警察用實彈對待示威者係不符合執法比例，只會加劇局勢；仲有當港府引用《緊急法》訂立《禁蒙面法》，前港督彭定康第一時間批評，特首嘅決定「瘋狂」（Crazy），市民會反抗云云，聽落英國對待暴力示威都幾「包容」喎，但係月初有環保組織係倫敦發起連場示威，倫敦警察廳馬上就引用《1986年公共秩序法》第14條，禁止有關嘅一切示威，否則就會被拘捕同起訴，短短半個月英國警方已經逮捕咗1642人，睇嚟英國根本就係講一套、做一套，發生喺本土嘅示威咪又係用盡一切方法遏止暴亂，佢哋如果批評港府、港警，係咪都要發個聲明譴責下自己個政府「濫捕」呢？

支持暴徒隨時引火自焚

近來明顯地多咗好多外國政客做「花生友」，公開表示支持、同情香港嘅抗爭者，呢班政客就係諗住，香港就算再亂落去都唔會關佢哋事，甚至可以藉暴亂攞著數，好似美國就借機推《香港人權與民主法案》計劃制裁香港，連帶打擊中央政府，喺中美貿易戰中圖利；廣男想講，如果香港嘅暴動模式散播去其他地方，好似巴塞隆那、倫敦咁，暴力喺佢嗰班「花生友」政客嘅地方「遍地開花」嘅話，咁就真係引火自焚報應不爽！依家全球一體化、資訊流通迅速，加上外國政客、媒體嘅推波助瀾之下，「黑暴病毒」肯定更快速地擴散到全球，今日係西班牙同英國，下次會唔會係美國？到時美國政府係咪要制裁番自己嘅官員、警察呢？

唔理係香港定係全世界嘅政府，都應該用適當手段去止暴制亂，外國政客今日縱容香港暴徒，他日自己地方嘅示威者，一樣可以仿傚、化身為「香港暴徒」；正如前美國總統奧巴馬所講，沒有任何藉口可以容許燒燬建築物、車輛、毀壞財物等破壞性行動，令市民處於危險之中；另外，前英國首相卡梅倫亦講過，襲擊警員同消防員，就係純粹嘅犯罪行為，依家香港果班暴徒幾乎各種暴行都差不多已經做齊晒，外國、外地政府唔知有冇勇氣，指出香港嘅所謂爭取民主、自由行動，本質係破壞、違法呢？

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app