民陣召集人岑子杰遇襲，據報係個半月第二次遇襲；事後盲反派「全體議員」發聲明強烈譴責襲擊，稱岑兩次遇襲都係喺舉行遊行之前，指幕後主使圖以暴力滅異見之聲，製造白色恐怖云云。對於岑子杰遇襲，囍雨認為大家都必須要譴責暴力，但近期喺社會受襲嘅人，既有平民，亦有警察，點解盲反派剩係譴責岑子杰或者其他「同路人」受襲，而對於其他人遇襲，又要視而不見呢？

襲擊有份呢種、果種？

今日囍雨再睇新聞，見到成為咗盲反派會議召集人無耐嘅陳淑莊，喺傳媒面前義正詞嚴地譴責暴力，話要「藉此機會嚴厲譴責呢種伏擊，呢種係不文明武力嘅襲擊 …」如果大家問囍雨，囍雨同陳淑莊一樣，都嚴厲譴責襲擊岑子杰嘅人，但伏擊以至襲擊，其實唔止一種，點解盲反派見自己人遇襲就譴責，其他人遇襲就默不作聲呢？

只要大家留意下近期新聞，會見到唔少人都俾暴徒襲擊，有啲喺街度同暴徒口角，結果就被毆打，有啲就被打到頭破血流、不支倒地，倒地之後仲繼續打；至於警察，有警察除咗俾暴徒圍毆、企圖搶警槍之外，有警員甚至俾疑兇割頸放血，仲俾人掟汽油彈燒身，又有警員俾暴徒淋腐蝕液，面對呢啲同樣必須嚴厲譴責嘅暴力行為，點解唔見盲反派譴責？點解佢哋唔同暴力割席？

雙重標準的政客 散播黑色恐怖

說穿了，就係一班盲反派議員、政客，根本就係雙重標準，如果係佢哋自己人遇襲，就大大聲譴責；相反，如果唔係同路人遇襲，佢哋就基於政治考量或者怕得罪班同樣「反政府」嘅暴徒，所以選擇唔出聲。最新嘅例子，就係警員被疑兇割頸，班盲反派議員有啲就話「無留意」咩事，有啲直頭質疑事件係「公安所為」；以前和理非嘅盲反派，今日就同暴徒「和你飛」，大家仲覺得佢哋會反暴力，係為正義、民主？唔好玩啦！

面對反覆無常嘅政客，大家有機會一定要問佢哋，佢哋願唔願意同暴徒割席，係咪仲要企喺暴徒一邊？當盲反派議員不斷強調「白色恐怖」嘅時候，其實依家社會出現一股由暴徒所造成嘅「黑色恐怖」，呢班盲反派議員、政客，都好應該發下聲，譴責下、制止下！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app