講到呢兩日嘅新聞人物之一、辭任香港大律師公會副主席嘅資深大律師蔡維邦，相信最為人所知嘅，當數佢曾任旺暴案被告、「本民前」前發言人梁天琦嘅辯護律師，當時佢仲喺庭上發表過一番「感言」，稱「其實今時今日喺度發生嘅事」，係因為佢哋呢一輩「貪圖逸樂、推卸爭取民主的責任」、「係我嘅generation，包括我在內製造出嚟」。但見證過香港呢四個月嘅黑暴運動之後，蔡維邦唔單止因為「分歧甚廣」而辭任大律師公會職務，仲喺報章撰文批評公會對「示威者」暴力同撐暴者「可恥地保持沉默」（shamefully silent）。囍雨認為，一個專業大律師，今日可以企出嚟講真話、明確譴責暴力，對於果啲因為政治立場而對暴力選擇唔出聲、唔割席嘅「專業人士」嚟講，簡直有如當頭棒喝。

無意義的破壞不會帶來「真民主」

為咗幫大家了解蔡維邦嘅文章，囍雨輯選咗媒體上一啲相關報道，供大家參考。例如蔡維邦提到，喺電視見到有人干犯嚴重罪行，包括燒銀行、破壞商舖和鐵路、殘酷地襲擊不同政見嘅市民；他指現時社會秩序崩潰帶來經濟災難，可能最終對香港嘅自治制度造成嚴重打擊。佢又批評，香港一啲「意見領袖」為暴徒尋找藉口，試圖怪責政府或其他人的做法，令人憂慮；只會令有關人等更膽大妄為，令市民面對更大傷害的風險；而最荒謬嘅係，所有痛苦及破壞並無意義，無人會預料持續嘅動盪會帶來「真正的民主」，所以佢希望自己嘅專業會採取明確嘅立場，譴責無知嘅違法行為。

勿以政治取向判斷是非黑白

講真，蔡維邦作為資深大律師，依家所講呢啲，係咪咩好艱深晦澀嘅大理論呢？囍雨覺得並唔係，而且正正相反，係所有人都應該明白嘅基本道理。簡單嚟講，就係人人都應該有明辨是非嘅良知，同時，社會上嘅專業人士唔應該以一己嘅政治立場去判斷是非黑白。今時今日，大家都知道呢場黑色恐怖破壞緊香港，但仲有人覺得可以「理解、諒解」，大家係咪應該深思一下，究竟燒銀行、打市民、掟汽油彈等等暴行，又可以帶嚟咩民主、人權呢？香港一向都好自由，但任何人都冇踰越法治嘅自由；人人必須守法、違法必有代價，囍雨認為呢個就係最基本嘅是非認知，亦都係香港法治精神最基本嘅出發點。

對「專業人士」的當頭棒喝

再進一步，當社會因為政治而出現紛爭之時，作為專業人士，有自己嘅私人立場，囍雨覺得無可厚非，但絕對唔應該將政治帶入自己嘅專業，更加唔可以因為「有立場」而影響對是非黑白嘅判斷。就以蔡維邦所講嘅法律界為例，大家諗下，如果連「法律人士」都唔譴責暴力、唔割席，會有咩後果（提下大家，大律師公會好似到依家都未明確譴責暴徒、同佢哋割席喎）？囍雨就話，必定會令暴徒覺得有人同行甚至有人撐腰，而更加膽大妄為、有持無恐。同理，囍雨認為，蔡維邦今次所講，對其他專業界別例如教師、醫護、機師等人士，同樣有如當頭一棒，值得警醒。其實某種程度上，「政治入侵專業」嘅危害，隨時比一朝一夕嘅破壞更加深遠。

另外，囍雨更加希望果啲仲要繼續「勇武」嘅暴力分子，可以聆聽一下蔡維邦嘅真心話，呢位資深大律師就以佢嘅專業經驗話畀大家知，其實任何刑事罪行都冇值得「浪漫化」嘅地方，尤其喺香港呢個法治之地，恣肆無意義嘅破壞之後，換嚟嘅隨時可能係漫長嘅刑期，係咪值得？自己諗下啦！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app