香港呢場黑暴運動已經持續四個月，發展到依家，唔知大家有冇發覺一個現象，就係暴徒人數少咗，但暴力程度升級咗。有意見認為，當成場黑色風暴開始出現瓦解徵兆之時，亦都正正係最危險嘅時候，因為當暴徒逐漸成為棄卒，散兵游勇感覺到沮喪、意識到被背棄被出賣嘅時候，極有可能導致「孤狼」嘅出現，佢哋會更暴力、更兇殘。廣男認為呢種分析非常值得大家參考，一方面必須對暴徒暴力提高警惕；另一方面，要止暴制亂，依家已經到咗關鍵時刻，唔可以手軟、退讓。

恐襲級嘅暴力

睇番近排嘅暴力場面，尤其喺過去兩個星期，廣男認為呢班「孤狼」式嘅極端暴徒已經趨於失控。大家有眼見，單單上個週末，旺角鬧市就出現伏擊警察嘅手機遙控炸彈，同一晚有暴徒以超過廿個汽油彈向警署發動密集式火攻，仲有人掟汽油彈燒警車；除咗「遠攻」，「埋身肉搏」同樣驚心動魄，有警員喺觀塘被人從後割頸、有暴徒飛腳襲警甚至企圖搶槍、又有人以士巴拿狂毆警察。更恐怖嘅係，暴徒依家已經唔單止針對警察，對普通市民同樣暴力。佢哋依家對「可疑市民」變得更加敏感，稍有唔妥就輕則被查、重則被打，甚至有暴徒瘋狂向住「人來人往」嘅港鐵站掟汽油彈。

仲有人煽風點火

廣男推測，呢啲「孤狼」式施襲可能至少抱有兩個目的，一係存心製造傷亡、 「搞大件事」，二係掙扎求「存」、延續「抗爭」。所以嚟到呢個階段，無論警員定係廣大市民，人身安全的確都會面臨好大嘅威脅。但喺呢個時候，廣男仲見到有媒體不斷美化緊啲暴徒暴力，一時稱汽油彈狂徒為「火魔法師」，一時又將襲警暴徒英雄化為「衝衝子」、「武俠」等等。而且大家唔好忘記，喺政界仲有一班盲反派政客包庇緊啲暴徒暴力、為佢哋撐腰，堅持不譴責不割席。廣男必須講，呢啲「美化」、煽風點火嘅禍害無異於火上加油，令到眼前亂局更加危險。

喺咁嘅局勢之下，廣大市民又可以點？廣男認為，雖然面對威脅，但絕對唔可以妥協、示弱，大家至少有兩件事可以做。第一係首先保護好自身同家人安全，時刻提高警覺，發覺異常嘅人同事，馬上通知警方；第二就係堅定支持警方依法止暴制亂。大家應該睇到，咁長時間以嚟，唯有警隊堅守住香港法治最後嘅防線，大家唔應該再畀佢哋孤軍作戰，只有警隊係打擊暴徒嘅最有效力量。呢場「反黑暴」之戰，已經到咗關鍵時候，需要大家齊出一分力；愈係窮寇，愈要一網打盡、繩之以法！

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app