理大專上學院講師陳偉強因為發表政見引起學生「不滿」，結果喺課堂俾學生圍咗幾個鐘，又用粗口鬧又用鐳射槍射佢，甚至發生推撞；明明陳偉強先係受害人，但報警校方竟然唔俾警察入學校，事後仲要將陳偉強調職。而作為所謂「教育專業團體」，教協竟然仲要包庇啲學生，話「學生包圍政見不同的老師是不可接受，但不評論校方是否應同時處分學生」，即係學生玩非法禁錮都唔駛罰？教協原來要保護嘅，係可能犯法嘅學生，有呢啲教育團體，教育界「病入膏肓」，學生就自然「危殆」，更難將佢哋帶返入正途！

教協枉為教師團體

對於教協呢種包庇涉事學生嘅回應，囍雨覺得只能夠用極度失望嚟形容，事情其實好簡單，就係一班學生不滿意陳偉強喺校外發表要嚴懲暴徒嘅意見，然後就去包圍、辱罵、推撞甚至非法禁錮陳偉強。咁件事應該點處理呢？如果係校方，梗係譴責、處分啲學生啦；至於教協，好明顯要保護涉事講師，譴責涉事學生再同佢哋割席！不過教協無咁做，好明顯係出於政治原因。

眾所周知，係反政府行動甚至暴亂持續咗咁耐，教協就一直企喺示威者甚至暴徒一邊，一班反政府嘅學生自然亦係教協嘅自己友；如今自己友涉嫌犯事，而政見不同嘅陳偉強成為受害者，最緊要「政治正確」嘅教協，好「自然」就企喺學生果邊，不敢譴責佢哋，更唔敢講罰佢哋。可憐嘅係陳偉強，俾學生包圍完兼俾人罰調職，但作為最大教師團體嘅教協竟然唔幫佢，唔講真係會以為教協變咗做「教育暴徒協會」！

理大一樣有問題！

至於理大專上學院，囍雨覺得一樣大有問題，發生咁嚴重嘅事，出事果時唔俾警察入學校救個講師，事後將受害講師調職，再俾人質疑之後，先話「院方會啟動既有機制，調查當天事件，並對任何違反校規及不當的行為，保留紀律處分的權利」？即係點，唔敢譴責學生？唔敢講會嚴懲學生？呢啲學校管理層，令人不齒！如果下次學生「有事」，囍雨預言，俾學生包圍嘅，一定係之前「包庇」學生嘅校方管理層，包括專上學院院長梁德榮。

其實，唔係所有教師組織都好似教協咁包庇不當行為，例如高等教育評議會，就表明對惡行表示強烈譴責，「要求理大高層關注事件，並盡一切辦法避免衝突，保障所有師生安全外，而陳的教席也不應該受事件影響」；引用反政府人士最鍾意嘅講法，呢啲咪人話囉，教協好，理大專上學院也好，係咪要你哋講句人話都咁困難呀？！ 

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app