中大校長段崇智噚日喺校內同學生舉行對話會，就當前香港問題各抒己見。廣男覺得，姑勿論「對話」效果如何，校方、校長有咁嘅安排，最起碼都係尊重學生嘅表現，但調番轉頭，學生又有冇表現出對等嘅尊重呢？廣男就覺得冇喇，一時打斷校長講嘢、一時粗口「問候」、甚至以鐳射筆照射校長，臨尾仲要唔畀校長走，逼佢譴責警察等等。廣男想問，依家我哋嘅校園、社會，係咪只要意見有唔同、或者有不滿，就要侮辱自己嘅師長呢？係咪一定要將自己嘅意見強加於其他人呢？

粗口、鐳射筆「招呼」校長

件事令廣男諗起自己做學生嘅日子，講真，果陣時嘅學生都試過「寸老師」，但始終都係和平嘅，唔會影響教學同校園氣氛。但睇住噚日喺中大禮堂發生嘅一幕幕，廣男實在汗顏。例如校長段崇智發言時，就有學生以「段狗可恥」、「DLLM」、「你唔好諗住走啊」等惡言侮辱、恐嚇，仲有人以鐳射筆直接照射佢身體；有心痛校園亂象嘅年長校友，就被人鬧「咁你咪去死囉！」；仲有一個非本地生發言時，場內更加係粗言穢語滿天飛、想達致滅聲效果。種種亂象不勝枚舉，總之「誰大誰惡誰正確」、聲大人多就係「道理」，成場對話會由頭到尾，廣男覺得似「批鬥校長會」多啲！

可能好多市民都會同廣男有同一個慨嘆：依家啲大學生點解會變成咁呢？唔知呢班大學生有冇諗過，當社會大眾、畢咗業嘅師兄師姐睇住佢哋咁樣肆意妄為，會有幾心痛；而一班師弟師妹睇住「前輩」如此蠻橫霸道，又會唔會以為自己將來都可以「有樣學樣」呢？其實可以入到大學唔係一件容易事情，相信佢哋亦都「讀過唔少書」先有今日，就算要「關心社會」，但都唔好忘記，學生「知書」係為咗「達禮」；「尊師」亦都係好重要嘅為人之道。廣男實在唔明，當社會文明不斷進步嘅時候，點解啲大學生反而連最基本嘅禮貌都冇咗呢？

黑色恐怖必須停！

另一個問題係，既然講得係「對話會」，咁大家都有自由表達意見嘅權利和自由，而唔係要強逼對方把口講出自己「啱聽」嘅說話。就好似其間有個女生控訴種種「警察問題」，段崇智一句「我譴責所有暴力」結果又引發學生不滿，成班人圍住佢唔畀走、又喊又鬧。廣男又真係唔明，點解係要逼人講出「我譴責警察」幾個字先肯收貨呢？廣男認為，對於警察有冇「問題」，大家可以斟酌求證、發表睇法，但另一方面，依家最迫切嘅問題，係唔可以再任由黑色恐怖繼續助長、蔓延。如何遏止暴力、令香港回復平靜，係咪大家更要深思呢？

原圖：環球時報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app