呢排反政府行動越搞越激，《生果報》作為力撐暴徒嘅報紙，幾乎日日吹雞或者鬧政府，大有要繼續煽動暴亂嘅意圖；但自從上週暴徒大肆破壞之後，唔少市民連港鐵都搭唔到，民意開始轉向，連《生果報》黎智英都寫文話依家「不是硬拼的時候」，稱「我們的策略不是以激烈的對抗贏取對方，而是以道德權威不屈不撓的精神消耗對方（Wear them out）。現在是我們冷靜思考的時候」，大有叫黑色暴徒「收兵」嘅意味。示威者如果唔「收兵」又如何？廣男覺得，大家真係要以史為鑑，了解下曾為黎智英「護衛」嘅郭紹傑變成盲反派棄卒嘅悲慘故事！

保護黎智英 仍得悲劇下場

如果大家喺違法「佔中」時有留意開金鐘「佔領區」嘅新聞，應該會知道當時經常坐陣金鐘嘅黎智英，有一次曾經俾人襲擊、掟豬雜，當時據報為金鐘「糾察長」嘅郭紹傑，佢正職係救生員，但不停攞緊「工傷」放緊假，都奮勇地為黎智英捉賊，連同其他人當場將施襲者制服，之後有唔少人都認為郭紹傑就係黎智英身邊嘅一大「護法」，覺得佢「護主有功」，以後實掂啦！

直到去年十二月，身為保釣行動成員嘅郭紹傑去咗日本靖國神社燒「神主牌」抗議被捕，盲反派嘅不近人情就暴露晒出嚟，郭紹傑直到今日依然被扣押（剛巧今日判刑），但有冇盲反派發起大型行動要救佢呢？有冇人向國際社會施壓？有幾多人去咗日本支持佢？答案係無，或者好少！黎智英又喺邊？Sorry，雖然郭紹傑曾經「護主有功」，但大家似乎都唔見黎智英有出手幫佢，郭紹傑就好似成為盲反派棄卒咁，未結案就俾人關押咗接近一年，喺監獄時刻掛念「比日本自由得多」嘅香港。

他朝君體也相同？

郭紹傑成為棄卒呢個故事，廣男覺得對依家啲暴徒大有啟發，依家黎智英篇文章好似「收兵論」咁，如果暴徒們肯收手，黎智英呢個盲反派最大金主或者仲肯照住班暴徒、示威者；但如果唔聽話呢，咁就可能會成為盲反派、反政府陣營嘅棄卒，真係你死你事！廣男有時幻想，郭紹傑可能都曾經托人向黎智英求助，但黎智英或者因為「都唔係我叫你去做，你去搞美國盟友，我點幫你」為由，並無出手相救。不過呢啲只係廣男自己嘅幻想，實情係點，黎智英點解唔救郭紹傑，或者暗中有幫大家唔知，真係要問返黎智英喇！咁啱得咁橋，廣男執筆嘅時候，郭紹傑被判囚8個月，最快聽日回港（已經坐咗十個月啦），大家真係要問下郭紹傑，有冇覺得俾盲反派捨棄，同埋係咪好掛住自由得多嘅香港呢？（笑） 

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app