不如等廣男先問大家一個問題。如果一架正常行駛嘅車輛因為被人惡意破壞而停駛，大家認為責任誰屬呢？廣男相信正常人都會譴責破壞者，而唔係歸咎負責駕車嘅人。但係當被破壞嘅對象換成港鐵，呢個最簡單、淺顯嘅道理，喺盲反派喉舌《生果報》同一啲政客口中竟然就完全顛倒嗮。廣男今日見到《生果報》至少兩篇報道，都係批評、質疑港鐵呢兩日封站、早收車「安排失當、影響大批市民」，真係要請問《生果報》一句，究竟有冇搞清楚件事嘅本質係暴徒打爛港鐵而令到市民冇車搭，點解都可以講到好似係港鐵有錯咁呢？《生果報》仲有咩顛倒是非嘅歪理係講唔出嘅呢？

《生果報》嘅報道話，港鐵喺長假後首個返工日（8號）陸續重開多個車站，但仍有11個車站要關閉，而且要提早於晚上8點收車，「結果造成交通一片混亂、繁忙時間多區交通嚴重擠塞」；另一篇報道就引用立法會交通事務委員會成員范國威嘅講法，批評港鐵既然從來無講過「車軌受損」，所以如果只係入閘機被破壞，「其實可透過人手解決」，封站係「本末倒置」、冇「合理性」等等。原來，喺《生果報》同范國威眼中，港鐵作為黑暴恐襲嘅受害者，反而造成「交通混亂」，請問呢啲係咩邏輯？大家又睇下，《生果報》同范國威由頭到尾有冇譴責過暴徒暴力呢？答案係半句都冇！

修復一次 破壞一次

其實過去幾個月當港鐵成為黑暴運動嘅「例牌」襲擊目標之後，就幾乎冇一日安寧過，但始終致力維持高效、安全嘅服務。廣男仲記得，之前有暴徒喺南昌站強行將緊急落客斜道掟落路軌，結果唔使一個鐘頭，港鐵就「解決問題」、恢復安全運行；又例如之前無論幾多個車站（包括一啲大站）被打爛幾多次、如何被燒到「體無完膚」，等到第二朝擘大眼，又照樣可以恢復運作、畀市民正常返工返學，就好似前一晚完全冇事發生過咁，唔知大家又有冇同感呢？

當大家都驚嘆港鐵好似有一種「神奇嘅自癒能力」時，廣男想講，喺呢種「自癒」能力嘅背後，大家又知唔知有幾多人徹夜不眠不休進行清理、修復工作？之但係，呢啲默默付出又有冇換嚟暴徒嘅「發善心、肯收手」？冇！連日嚟暴徒照樣針對港鐵施暴，即使係被迫關閉嘅車站，都被人強行拉開鐵閘進行破壞。大家要明白，面對呢種「修復一次就打爛一次」嘅暴行，無論幾神奇嘅「魔法」都有枯竭嘅一日，誠如港鐵負責人所講，依家可以用嚟維修嘅零件已經「換無可換」，喺咁嘅情況之下，大家覺得《生果報》同埋盲反派政客反而將「停運」責任歸咎港鐵，係咪講得通呢？

所有幸福都不是必然

廣男今日仲聽到電台一位嘉賓講，好多外國人都讚歎香港地鐵效率高，如果喺外國，地鐵站被破壞成咁「起碼封站三個星期」。呢句話令廣男深有感觸，請大家要明白，所有嘅幸福都唔係必然，就好似香港嘅鐵路系統，當大家習慣咗享受佢嘅高效運作，就應該更加珍惜，喝止果班不停破壞嘅暴徒，而唔係等佢被破壞到無可挽救、影響埋自己出行，先嚟明白咩叫切膚之痛。廣男唔知港鐵、以至香港社會嘅其他「機能」仲要「受難」幾長時間，但可以肯定嘅係，暴力一日唔停，香港就一日無得復原。到時，唔知《生果報》同盲反派又唔會唔幫大家「修復」呢？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app