呢兩日，港鐵因為受到暴徒大肆破壞，有車站要關閉，服務時間亦縮短，唔少地區都出現大批市民排隊搭車，唔同道路都非常擠塞；對於暴徒嘅黑色暴力破壞，好多人都覺得深受其害、深深不忿，但喺呢個情況之下，竟然仲不時聽到有人話要「諒解」班暴徒「點解要咁做」，認為佢哋都係「為咗香港未來啫」。四個月前佢哋遊行，有人諒解；之後佢哋掟磚，有人又諒解；依家將香港唔同設施打到稀巴爛，有人都仲話要諒解。到底暴徒要幾無良知、幾無底線，啲人先至會唔諒解佢哋？再咁落去，任何人、任何時候都可能成為受害者！

從示威者開始 用暴力「終結」

好記得喺6月初，當時反對《逃犯條例》修訂嘅浪潮開始掀起，唔少市民都參與遊行，但由6月9日晚（6月10日零晨）開始，就有人用暴力衝擊警方防線；之後到6月12日，就有人喺暴力示威期間開始掟磚、掟鐵枝，當時唔少人覺得，佢哋只係爭取民主、自由啫，大家應該「諒解」啲激進示威者甚至暴徒。

事情發展到近兩個月，暴徒暴力不斷升級，由掟磚升級到無限量掟汽油彈，由衝擊警方防線變成瘋狂圍毆警察企圖搶槍，甚至用汽油彈「謀殺」警察；商舖、書店同鐵路亦變成暴徒睇唔過眼嘅攻擊目標，有銀行被大肆破壞、焚燒，尤如戰後「廢墟」，有人繼續諒解。其他市民是否依然「安然無恙」？諗都唔好諗，暴徒近期頻頻圍毆、「私了」其他市民，有啲仲俾暴徒打到頭破血流「昏死」街頭。發生咁多暴力事件，以至近日鐵路系統被癱瘓，竟然仲有人話要諒解暴徒，囍雨想問一句，如果我哋要諒解啲暴徒，咁邊個諒解無辜嘅市民呢？

繼續縱容 自己終將受害

撇除黑色暴力有幾錯、犯咗幾嚴重嘅罪行唔講，囍雨想指出，呢啲黑暴再蔓延落去，遲早有一日喺大家或者大家嘅身邊人會受害。當暴徒破壞政府部門、警署等，因為大家唔係公務員、紀律部隊成員，所以大家唔出聲，要「諒解」暴徒；之後當暴徒破壞鐵路、唔同店舖，因為大家唔係鐵路人員、唔係啲店舖嘅職員，所以唔出聲；到之後暴徒圍毆、「私了」市民，因為大家唔出聲所以當無事發生。但如果有一日，下一個受害者，可能就係大家或者大家嘅身邊人，到時大家仲係唔係咁豁達，覺得要諒解暴徒？繼續唔出聲，咁香港嘅黑色暴亂，定必永無止境，最終受害人只會係自己！