持續四個月嘅黑暴運動喺過去幾日變得更加瘋狂、變本加厲，高效運作嘅鐵路系統被打到全線癱瘓，商舖被打爛、銀行被放火，警察被掟汽油彈，無辜嘅市民被暴徒「私了」，種種暴行除咗嚇親香港人唔敢出街之外，亦都嚇到遊客唔敢嚟香港。毋庸置疑，呢種黑色恐怖嘅破壞，已經令到之前一啲人揚言嘅所謂「攬炒」開始顯露跡象，就好似啱啱過去呢個週末長假同埋內地國慶假咁，原本係大家「有人消費、有人搵食」嘅「黃金周」，但依家嘅香港就好似步入咗寒冬咁，百業蕭條。囍雨喺度諗，對於好多喺受影響行業裡面艱難搵食、手停口停嘅打工仔嚟講，呢場黑色恐怖嘅危害同「謀殺」佢哋其實冇咩分別。

黃金周內地客減少五成六

囍雨近日睇到報到話，今年呢個「內地黃金周」，首六日嘅內地訪港旅客數字比舊年少咗56%，而嚟自其他地區嘅旅客亦都下跌咗三成幾。大家可能都預計到香港零售業必定首當其衝，但又有幾多人可以想像有幾嚴重？囍雨見到批發及零售界立法會議員邵家輝就話，過去幾日好多店舖其實都係「零生意額」，無論係鐘錶、珠寶呢啲貴價奢侈品，抑或化妝品、藥房呢啲日常用品，生意額全部都係雙位數跌幅，部分貨品跌幅仲高達八成。但個影響係咪「只限於此」呢？囍雨可以話畀大家知，絕對唔止！

試諗下，撇開唔敢嚟香港嘅遊客，就算嚟咗香港果啲遊客亦都唔知可以去邊，地鐵停運冇得去景點，就算喺酒店附近，大型商場都被迫落閘冇得購物；想食嘢？對唔住，好多鬧市一係被暴徒封堵咗路根本去唔到，即使好彩去得到，好多食肆商舖都唔敢開門（部分更直頭被破壞嗮）。遊客係咁，對本地人又係點？同樣邊度都冇得去，即使想一家人落街飲茶都難，想走親訪友更加唔知「有冇得返屋企」。簡單嚟講，就係好多唔同行業，都連帶受到唔同程度嘅衝擊。大家又諗下，喺呢啲唔同行業搵食嘅又係咩人？咪又係香港人囉！

害死人 害埋自己

俗語都有講，斷人衣食猶如殺人父母，當依家嘅黑色恐怖日日席捲各區、打砸搶燒時，佢哋又會唔會諗過，自己每「所過一處」，分分鐘會令到好多店舖從此冇得再「翻生」，好多打工仔可能從此變成失業大軍。囍雨想講，其實擺喺大家面前嘅事實已經好明確，如果呢場黑暴運動喺呢一刻可以停止，或者香港經濟仲有一線生機，但如果繼續打落去，無異於要其他香港人一齊「陪葬」，甚至害埋自己嘅家人、親友。執筆之時，囍雨又見到最新消息話，港大最新預測今年香港GDP實質零增長。香港市道依家已經係咁，遲啲又會點？囍雨真係唔敢諗。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app